اسلام آباد۔30جنوری (اے پی پی):ڈپٹی سپیکر قومی اسمبلی قاسم خان سوری نے چینی کیمونسٹ پارٹی کی صد سالہ تقریبات کے حوالے سےاپنے وڈیو پیغام میں کہا ہے کہ چینی کیمونسٹ پارٹی کی صد سالویں سالگرہ پر مبارکباد پیش کرتا ہوں، جس طرح کیمونسٹ پارٹی نے 70 سالہ اقتدار میں اپنے ملک کو غربت کی لکیر سے نکالا جو دنیا کی تاریخ میں ایک مثال ہے اور کیمونسٹ پارٹی دنیا کی تاریخی جماعت ہے کہ جو اتنا بڑا انقلاب لے کر آئی۔ چینی کیمونسٹ پارٹی نے تقریباً 80 کروڑ لوگوں کو غربت کی لکیر سے نکالا۔ قاسم خان سوری نے کہا کہ چین نے جس تیزی سے ترقی کی ہے اور دنیا میں ایک بڑی اقتصادی قوت بنا ہے وہ ایک مثال ہے۔ 2018 سے پاکستان میں برسر اقتدار پاکستان تحریکِ انصاف چینی کیمونسٹ پارٹی کو اس بے مثال کامیابی پر مبارکباد پیش کرتی ہے۔ڈپٹی سپیکر قومی اسمبلی نے کہا کہ چین پوری دنیا اور خاص کر ہمارے ایشیا میں ایک مثال ہے جس طرح چین نے ترقی کی اپنی پوری قوم میں ڈسپلن لے کر آئے اپنی ترقی سے پوری دنیا کو حیران کر دیا۔ ایک ارب 40کروڑ آبادی والے ملک نے اپنے لوگوں کو سہولیات دیں اپنی جی ڈی پی بڑھائی وہ قابل تقلید ہے۔ انہوں نے کہا کہ ہم چین کے ساتھ مل کر اپنے ملک میں ترقی لا سکتے ہیں، چین کے ساتھ سی پیک کا منصوبہ ایک عظیم منصوبہ ہے اس سے پاکستان اور اس خطے میں ترقی آئے گی۔ چین پاکستان کا ایک پرانا اور آزمودہ دوست ہے اور مشکل کی ہر گھڑی میں پاکستان کے ساتھ کھڑا رہا ہے، جس طرح چین نے کورونا کے دوران بھی پاکستان کا ساتھ دیا اس پر ان کا شکر گزار ہوں۔ قاسم خان سوری نے امید ظاہر کی کہ جس طرح چینی کیمونسٹ پارٹی کے 70 سالہ دورِ اقتدار میں چین کی عوام خوش ہے بلکل اسی طرح آنے والے وقتوں میں بھی چینی عوام خوش رہے گی۔
