اسلام آباد۔8دسمبر (اے پی پی):ڈائریکٹر جنرل اینٹی نارکوٹکس فورس میجر جنرل محمد عارف ملک نے منشیات کی سمگلنگ میں ملوث بڑے سمگلروں کے ساتھ آہنی ہاتھوں سے نمٹنے ضرورت پر زور دیتے ہوئے ملک میں منشیات کی سمگلنگ میں ملوث ملزمان بالخصوص تعلیمی اداروں میں منشیات کے استعمال کی روک تھام کے لئے خصوصی اقدامات کی ہدایت کی ہے۔ وہ منگل کو اینٹی نارکوٹکس فورس کے ہیڈ کوارڑٹرز میں منعقدہ فورس کمانڈرز کے اجلاس کی صدارت کر رہے تھے۔ اجلاس میں اے این ایف کے علاقائی کمانڈروں اور سینئر اسٹاف افسران نے شرکت کی۔ اجلاس کے دوران ڈائریکٹر جنرل اے این ایف نے ادارہ کے تمام شعبہ جات کی کارکردگی کو سراہا۔ اجلاس کے دوران انسداد منشیات کی کارروائیوں، بین الاقوامی معاہدے، منشیات کی رسد اور طلب میں کمی لانے کے پروگراموں اور منشیات کے عادی افراد کے علاج معالجہ سے متعلق امور کا تفصیلی جائزہ لیا گیا۔ اجلاس کے دوران مصنوعی طریقے سے تیار کی گئی منشیات کی صورتحال اور اس کی جانب بڑھتے ہوئے رجحان کا جائزہ لیا گیا۔ ڈائریکٹر جنرل اے این ایف نے ملک میں منشیات کی سمگلنگ میں ملوث ملزمان خصوصاً تعلیمی اداروں میں منشیات کے استعمال کی روک تھام کے لئے خصوصی اقدامات کی ہدایت کی۔ ڈی جی اے این ایف نے تعلیمی اداروں میں منشیات فراہم کرنے والے عناصر کے خلاف سخت کارروائی کرنے کی بھی ہدایت کی۔ انہوں نے منشیات کی سمگلنگ میں ملوث بڑے سمگلروں کے ساتھ آہنی ہاتھوں سے نمٹنے ضرورت پر زور دیا۔ مزید برآں ڈی جی اے این ایف نے منشیات کے جرائم میں اشتہاری ملزمان کی گرفتاری اور ان کوکیفر کردارتک پہنچانے کے لئے جاری ملک گیر مہم کو مزید تیز کرنے کے احکامات جاری کئے۔ ڈائریکٹر جنرل اے این ایف نے منشیات کی سمگلنگ کی روک تھام کے لئے جاری اقدامات کی پیشرفت کا جائزہ لیا اور منشیات کی سمگلنگ میں ملوث عناصر کی گرفتاری پر خصوصی زور دیا۔ اجلاس کے دوران منشیات کے خلاف عوامی سطح پر شعور بیدار کرنے، مالی و انتظامی امور اور محکمانہ صلاحیت میں اضافے جیسے امور زیر بحث آئے۔ علاوہ ازیں مستقبل کے اہداف مقرر کئے گئے اور نئے اقدامات عمل میں لانے اور محکمہ کی استعداد بڑھانے کے منصوبوں پر خصوصی غور کیا گیا۔
