ڈیرہ اسماعیل خان۔ 20 جنوری (اے پی پی):ایڈیشنل سیشن جج ڈیرہ، مبارک زیب نے ایک اہم مقدمے کا فیصلہ سناتے ہوئے تحصیل پروآ کے علاقے بچڑی میں راستے کے تنازع پر پیش آنے والے سنگین واقعے پر 52 سالہ شاہجہان ولد الٰہی بخش کو پانچ سال قید سخت، پچاس ہزار روپے جرمانہ اور 81 لاکھ 3 ہزار 955 روپے کی نصف رقم ( 40 لاکھ 51 ہزار 977 روپے ) زخمی کو ادا کرنے کا حکم دیا ہے۔
یہ مقدمہ یکم فروری 2022 کو تھانہ پروآ میں درج کیا گیا تھا، جس میں بتایا گیا کہ مجرم شاہجہان نے راستے کے تنازع پر اپنے پڑوسی 20 سالہ نوجوان نعیم اللہ ولد غلام محمد کو سر پر کلہاڑی کے وار سے شدید زخمی کردیا تھا۔ واقعے کے بعد پولیس نے فوری کارروائی کرتے ہوئے مقدمہ درج کیا اور ملزم کو گرفتار کرلیا۔ عدالت میں سماعت کے دوران استغاثہ نے ٹھوس شواہد پیش کیے، جن میں چشم دید گواہوں کے بیانات اور میڈیکل رپورٹس شامل تھیں۔ جج نے شواہد کی بنیاد پر مجرم کو مجرم قرار دیتے ہوئے سزا سنائی۔ زخمی نعیم اللہ جو اس حملے کے نتیجے میں طویل عرصے تک طبی مشکلات کا شکار رہا، اب انصاف کے فیصلے کے تحت معاوضہ حاصل کرے گا۔ عوامی حلقوں نے عدالت کے اس فیصلے کو سراہا ہے اور اسے انصاف کی جیت قرار دیا ہے۔
یہ فیصلہ مقامی سطح پر قانونی نظام پر عوامی اعتماد کو بحال کرنے میں معاون ثابت ہوگا اور آئندہ ایسے تنازعات کے پرتشدد حل کی حوصلہ شکنی کرے گا۔
Short Link: https://urdu.app.com.pk/urdu/?p=548790
