واشنگٹن۔9نومبر (اے پی پی):ڈی سی پبلک سکولز میں کھانوں/ پکوان کا عالمی دن منایا گیا‘روایتی پاکستانی ڈِش آلو چنا سالن دوپہر کے کھانے میں پیش کیا گیا۔ ڈی سی پبلک سکولز گلوبل ایجوکیشن نے ڈی سی پبلک سکولز کے تمام عالمی معلمین، طلباء اور عملے کو پکوان کے عالمی دن کی مبارک باد دی۔
تمام ڈی سی پبلک سکولز میں پکوان ڈے کے موقع پر امریکہ میں پاکستان کے سفیر اسد مجید خان کا پیغام پڑھ کر سنایا گیا جبکہ دوپہر کے کھانے میں پاکستانی کھانا بھی پیش کیا گیا۔اپنے پیغام میں پاکستانی سفیر نے ڈی سی پبلک سکولز کے طلباء اور معلمین کو پکوان ڈے پر مبارکباد دی۔
اسد مجید خان نے کہا کہ پاکستان جغرافیائی لحاظ سے انتہائی اہمیت کا حامل ہے‘پاکستان ، سندھی، گندھارا اور مہر گڑھ تہزیبوں کا وارث ہے۔ انہوں نے کہا کہ پاکستانی کھانے دنیا بھر میں مشہور ہیں ، جو کہ ترکش، فارسی ، وسطی ایشیا ء اور بر صغیر کے روایتی کھانوں پر مشتمل ہیں‘ پاکستانی کھانے جن میں گوشت، دالیں، سبزیاں اور تمام قسم کے حلوا جات ذائقوں سے بھرپور ہیں۔
انہوں نے کہا کہ آج کے دن پاکستانی سفارتخانہ کی جانب سے روایتی پاکستانی ڈِش آلو چنا سالن کا انتخاب کیا گیا ہے جو کہ تمام ڈی سی پبلک سکولز میں دوپہر میں پیش کیا جارہا ہے۔ پاکستانی سفیر نے کہا کہ مجھے یقین ہے کہ آج کے دوپہر کے کھانے میں ڈی سی پبلک سکولز کے طلباء اور معلمین ذائقے سے بھرپور پاکستانی آلو چنا سالن سے لطف اندوز ہوں گئے۔
اس موقع پر تمام سکولز میں پاکستانی کھانوں سے متعلق ایک ڈاکومینٹری بھی پیش کی گئی جس میں پاکستانی کھانوں کو متعارف کرایا گیا۔ اس موقع پر پاکستانی سفارتخانہ کی ترجمان ملیحہ شاہد کی جانب سے مبارکباد کا پیغام بھی سنایا گیا۔
