اسلام آباد۔19جولائی (اے پی پی):وزیراعظم شہباز شریف نے کشمیریوں کے عزم آزادی کو سلام پیش کرتے ہوئے کہا ہے کہ کشمیری نسل در نسل اپنے جائز اور منصفانہ حق خوداردیت کے حصول کے لئے عظیم قربانیاں دے رہے ہیں ،اقوام متحدہ کی سلامتی کونسل کی قراردادوں اور کشمیری عوام کی امنگوں کے مطابق تنازعہ کشمیر کے حل اور استصواب رائے کے منصفانہ حق کے حصول تک پاکستان کشمیریوں کی ہر ممکن مدد کرتا رہے گا، ان خیالات کا اظہار انہوں نے یوم الحاق پاکستان کے موقع پر اپنے پیغام میں کیا، ہر سال 19 جولائی کو کشمیری عوام یوم قرارداد الحاق پاکستان کے طور پر مناتے ہیں۔
اس تاریخی دن پاکستان سے الحاق کی قرارداد منظور کی گئی تھی، سرینگر کے مقام پر تاریخی قرارداد الحاق پاکستان کی منظوری کے بعد آزادکشمیر اور گلگت بلتستان کے عوام نے ایک بڑی جنگ آزادی لڑی اور ریاست کے ایک حصے کو ڈوگرہ مہاراجہ کے ظالمانہ شکنجے سے آزاد کرایا، کشمیریوں کی لازوال قربانیوں کی 1947ء سے شروع ہونے والی جدوجہد آج بھی جار ی ہے اور 9 لاکھ سے زائد بھارتی قابض فوج کشمیریوں کا عزم آزادی متزلزل کرنے میں ناکام رہی ہے جبکہ وقت گزرنے کے ساتھ ساتھ کشمیریوں کے جذبہ آزادی میں بے پناہ اضافہ ہو اہے۔
وزیراعظم نے کہا کہ کشمیری نسل در نسل اپنے جائز اور منصفانہ حق خوداردیت کے حصول کے لئے عظیم قربانیاں دے رہے ہیں ، انہوں نے کہا کہ اقوام متحدہ کی سلامتی کونسل کی قراردادوں اور کشمیریوں کی امنگوں کے مطابق تنازعہ کشمیر کے حل اور استصواب رائے کے منصفانہ حق کے حصول تک پاکستان کشمیریوں کی ہر ممکن مدد کرتا رہے گا۔
دریں اثناء اپنے ٹویٹ میں وزیراعظم شہباز شریف نے کہا کہ یومِ الحاقِ پاکستان، کشمیریوں کے پاکستان سے الحاق کے خواب کے شرمندہ تعبیر ہونے تک جدوجہد جاری رکھنے کے عہد کی تجدید کا دن ہے، انہوں نے کہا کہ بھارتی ریاستی مظالم اس مزاحمت، قربانی اور عزم کو ماند نہیں کر سکے، ہم کشمیریوں کے اس عظیم جذبے کو سلام پیش کرتے ہیں۔
Short Link: https://urdu.app.com.pk/urdu/?p=318038
