پشاور۔ 16 مئی (اے پی پی):کنگ سلمان ریلیف سینٹر کی طرف سے پاکستان کے 33 اضلاع میں 30 ہزار فوڈ پیکجز تقسیم کئے گئے۔ ترجمان کے مطابق 30 ہزار فوڈ پیکجز سے 2 لاکھ سے زائد افراد مستفید ہوئے،یہ اقدام ملک کے مختلف علاقوں میں غربت کی لکیر سے نیچے زندگی گزارنے والے ہزاروں مستحق خاندانوں کی مدد کے لیے ہے۔
ان اضلاع میں گلگت بلتستان کے 5 اضلاع (دیامر، استور، غذر، ہنزہ اور شگر)، آزاد کشمیر کے5اضلاع (وادی نیلم، مظفرآباد، وادی جہلم، باغ اور سدھنوتی)، پنجاب کے7 اضلاع (لاہور، ڈی جی خان، مظفرگڑھ، بہاولپور، اوکاڑہ، لیہ، اور بہاولنگر)، سندھ کے5اضلاع (سکھر، خیرپور، عمرکوٹ، جامشورو، اور مٹیاری) اور بلوچستان کے 11 اضلاع (قلعہ سیف اللہ، ژوب، کچھی، لسبیلہ، قلات، ڈیرہ بگٹی، کوئٹہ، قلعہ عبداللہ، سبی، لورالائی، اور پشین) شامل ہیں۔ہر فوڈ پیکیج کا وزن 95 کلوگرام ہے جس میں 80 کلوگرام آٹا، 5 لیٹر خوردنی تیل، 5 کلوگرام چینی اور 5 کلوگرام چنے کی دال شامل ہے۔
تقسیم کا عمل شفافیت کے ساتھ کنگ سلمان ریلیف سینٹر کی نگرانی میں ضلعی انتظامیہ، پیس اینڈ ڈویلپمنٹ آرگنائزیشن اور حیات فانڈیشن کے تعاون سے مکمل کیا گیا۔یہ اقدام پاکستان میں غذائی عدم تحفظ کے خاتمے اور مستحق خاندانوں کی فلاح و بہبود کے فروغ کے لیے کنگ سلمان ریلیف سینٹر کی مستقل وابستگی کا مظہر ہے۔
Short Link: https://urdu.app.com.pk/urdu/?p=597838
