فیصل آباد۔ 24 اپریل (اے پی پی):گندم کی کٹائی شروع ہونے کے باعث ویٹ سٹرا چاپر بلور مشین کی مانگ میں زبردست اضافہ ہو گیاہے جبکہ زرعی انجینئرز کی تیار کردہ مذکورہ مشین کو اب فیصل آباد سمیت ڈسکہ، حافظ آباد، اوکاڑہ، میاں چنوں، ملتان اور بعض دیگر شہروں کے لوکل ایگریکلچرل مشینری مینوفیکچررز گروپس نے بھی تیار کرنا شروع کردیا ہے جس کے استعمال سے کاشتکار نہ صرف جانوروں کیلئے بہترین معیار کا بھوسہ حاصل کرسکتے ہیں بلکہ اپنی زمین کی زرخیزی کو برقرار رکھتے ہوئے فی ایکڑ پیداوار میں اضافہ بھی یقینی بناسکتے ہیں۔
ایگریکلچرل مشینری مینوفیکچررز ایسوسی ایشن کے ترجمان میاں زاہدنے اے پی پی کو بتایاکہ کمبائن ہارویسٹر کے ذریعے گندم کی برداشت کے بعد کھیت میں ناڑ کو اکٹھا کرنا اور سنبھالنا ایک مشکل عمل تھا اسلئے کاشتکار اگلی فصل کی تیاری کیلئے ناڑ کو آگ لگا دیتے تھے جس سے نہ صرف ماحولیاتی آلودگی میں اضافہ ہوتا تھا بلکہ زمین کا درجہ حرارت بڑھنے سے نامیاتی مادے ضائع اور زیر زمین مفید حشرات بھی مر جاتے تھے۔
انہوں نے بتایاکہ اس مسئلہ کے حل کیلئے ایگریکلچرل انجینئرز اور زرعی ماہرین نے ویٹ سٹرا چاپر بلور مشین تیار کی جو ٹریکٹر سے چلتی ہے اور کمبائن ہارویسٹر کے ذریعے گند م کی برداشت کے بعد ناڑ کو اکٹھا کر کے بھوسہ بنانے کے بعد ٹرالی میں منتقل کر دیتی ہے۔ انہوں نے بتایاکہ اس مشین کے استعمال کے کم خرچ بالا نشیں ہونے کے مقولہ کے مصداق انتہائی مثبت نتائج حاصل ہو رہے ہیں۔
Short Link: https://urdu.app.com.pk/urdu/?p=587100
