کراچی۔ 25 اگست (اے پی پی):گورنر سندھ کامران خان ٹیسوری سے حیدرآباد سائٹ ایسوسی ایشن کے چیئرمین عبد الرحمان راجپوت کی سربراہی میں وفد نے ملاقات کی اورانکروچمنٹ، بجلی، پانی اور سیکیورٹی سمیت اہم مسائل پر تفصیلی گفتگو کی گئی۔پیر کو گورنر ہائوس سے جاری اعلامیہ کے مطابق وفد نے گورنر سندھ کو حالیہ بارشوں کے باعث ہونے والے نقصانات، کاروباری سرگرمیوں کی بندش اور صنعتی مشکلات سے آگاہ کیا۔ گورنر سندھ کو بریفنگ میں بتایا گیا کہ حیدرآباد سائٹ ایریا میں بگڑتے ہوئے انفراسٹرکچر کے باعث اب تک 150صنعتیں بند ہوچکی ہیں، جس سے نہ صرف معیشت بلکہ ہزاروں مزدوروں کا روزگار بھی متاثر ہوا ہے
۔چیئرمین سائٹ ایسوسی ایشن نے کہا کہ اربوں روپے ٹیکس دینے والے سندھ کے دوسرے بڑے شہر حیدرآباد کا کوئی پرسانِ حال نہیں، صنعتکار اور تاجر شدید مشکلات کا شکار ہیں۔اس موقع پر گورنر سندھ نے حیدرآباد کی ڈویژنل و ضلعی انتظامیہ اور ایم ڈی سائٹ سے فوری رابطہ کیا اور متعلقہ حکام کو کاروباری برادری کے مسائل ترجیحی بنیادوں پر حل کرنے کی ہدایت جاری کی۔ انہوں نے صنعتکاروں کو مکمل تعائون اور مسائل کے جلد از جلد حل کی یقین دہانی کراتے ہوئے کہا کہ تاجر اور صنعتکار ملکی معیشت کی ترقی و استحکام کی ریڑھ کی ہڈی ہیں، ان کے مسائل کو ترجیحی بنیادوں پر حل کیا جائے گا۔
