لاہور۔14 جولائی (اے پی پی )گور نر پنجاب چوہدری محمدسرور سے چیئر مین این ڈی ایم اے لیفٹیننٹ جنرل محمد افضل کی ملاقات جبکہ گور نر پنجاب نے چیئر مین اے ڈی ایم اے کو پنجاب میں کورونا سے متاثرہ غر یب خاندانوں کو راشن ،ڈاکٹرز اور طبی عملے کو حفاظتی سامان کی فراہمی بارے بتایا۔ تفصیلات کے مطابق گور نر پنجاب چوہدری محمدسرور سے چیئر مین این ڈی ایم اے لیفٹیننٹ جنرل محمد افضل نے گور نر ہائوس لاہور میں ملاقات کی جس میں کورونا سے بچائو کے لیے حکومتی اقدامات و سہولتوں کی فراہمی پر بات چیت کی گئی۔گورنر چوہدری محمدسرور نے کورونا کیخلاف این ڈی ایم اے کے کردار کو سر اہتے ہوئے چیئر مین این ڈی ایم اے کو بتایا کہ ہم فلاحی تنظیموں کیساتھ ملکر پنجاب ڈویلپمنٹ نیٹ ورک (پی ڈی این) کے ذریعے500کروڑ راشن سمیت دیگر مدد میں خرچ کر چکے ہیں جبکہ ڈاکٹرز سمیت13لاکھ افراد میں میڈیکل کٹس ،ماسک ، پی پیزکٹس اور سینی ٹائزر بھی تقسیم کیے ہیں۔ اُنہوں نے بتایا کہ لاہور سمیت پنجاب بھر کی جیلوں میں قیدیوں اور عملے کو ماسک اور سینی ٹائزر سمیت دیگر حفاظتی سامان بھی دیا ہے پی ڈی این اے 13لاکھ سے زائد غر یب خاندانوں کو راشن بھی فراہم کرچکی ہے۔گور نے کہا کہ کورونا کیخلاف وزیر اعظم کی قیادت میں حکومتی اقدامات مثالی ہیںاور انشاء اللہ ہم سب نے ملکر کورونا کو شکست دینی ہے جسکے لیے ضروری ہے کہ عوام کورونا سے بچائو کیلئے کورونا ایس او پیز پر عملددرآمد کو یقینی بنانے کیلئے اپنی ذمہ داری پوری کر ے۔ ملاقات کے دوران چیئر مین این ڈی ایم اے لیفٹیننٹ جنرل محمد افضل نے کہا کہ پاکستان میں کورونا کے حوالے سے صورتحال بہتری کی طرف جارہی ہے شرح اموات میں کمی آئی ہے، وینٹی لیٹرز پر موجود افراد کی تعداد میں بھی کمی آئی ہے عید کے موقعہ پر بھی کورونا سے بچائو کے لئے حفاظتی اقدامات کو یقینی بنانا ہوگا۔چیئر مین این ڈی ایم اے نے کہا کہ اسمارٹ لاک ڈائون کے بہت اچھے رزلٹ آنے شروع ہوئے ہیں۔انہوں نے کہا کہ وفاقی دارلحکومت آئسولیشن اسپتال 4 ملین ڈالر کی لاگت سے چین کی مدد سے بنایا گیا ہے یہ اسپتال وبائی امراض کے حوالے سے استعمال ہو گا اس کے علاوہ چھ مزید اسپتال بنانے کے لیے چالیس کنال زمین الاٹ کر دی گئی ہے۔
