نیو یارک ۔6جون (اے پی پی):طاقتور دوستی کے تحت نیویارک سٹی کے میئر ایرک ایڈمز نے سرکاری رہائش گاہ گریسی مینشن میں منعقدہ اجلاس کے دوران پاکستان کے وزیر مملکت برائے کرپٹو اینڈ بلاک چین بلال بن ثاقب سے گفتگو کے دوران کہا کہ ’’ہم نیویارک کو لاہور سمجھتے ہیں‘‘۔جمعہ کو یہاں موصولہ پریس ریلیز کے مطابق انہوں نے کہا کہ نیو یارک سٹی اور پاکستان دونوں نے ڈیجیٹل اکانومی کی ذمہ دارانہ ترقی کی معاونت کے لیے وقف کرپٹو کونسلز قائم کر کے جرات مندانہ اقدامات کیے ہیں جو کے مستقبل کو تشکیل دینے کے لیے حکومت کے دو اداروں نیو یارک کرپٹو کونسل اور پاکستان کرپٹو کونسل کے درمیان براہ راست تعاون کی تعمیر کی عکاسی کرتے ہیں۔
میئر ایڈمز اور بلال بن ثاقب نے ریگولیٹری تعمیل کو یقینی بناتے ہوئے جدت کو فروغ دینے کے لیے علم کے اشتراک کے اقدامات، صلاحیت سازی کے پروگراموں اور سٹریٹجک مشاورتی کوششوں کو مشترکہ طور پر تیار کرنے کے مواقع کا تفصیلی جائزہ بھی لیا اور دونوں رہنماؤں نے متنوع، اعلیٰ امکانات والی منڈیوں میں ڈیجیٹل اثاثہ جات پر مبنی معیشت کے فروغ کے لیے مشترکہ چیلنجوں اور طریقوں پر بھی تبادلہ خیال کیا گیا۔ میئر ایڈمز نے دنیا بھر کے مسلمانوں کو عید کی مبارکباد دیتے ہوئے کہا کہ 8 لاکھ سے زیادہ مسلمان شہریوں کے ساتھ نیویارک سٹی ریاستہائے متحدہ میں سب سے بڑی اور متحرک مسلم کمیونٹیز میں سے ایک ہے۔
ملاقات میں ثقافتی تعلق اور مشترکہ ڈیجیٹل مستقبل کے لئے باہمی تعاون کے فروغ پر بھی تبادلہ خیال کیا گیا۔ وزیر مملکت بلال بن ثاقب کے سرکاری دورہ کے اختتام پر بلاک چین اختراعات، پبلک پرائیویٹ پارٹنرشپ اور عالمی کرپٹو تعاون کو آگے بڑھانے کیلئے گریسی مینشن میں ہونے والی ملاقات کے دوران عالمی ٹیک لیڈر شپ میں نیویارک سٹی کے اہم کردار اور ڈیجیٹل اثاثہ کی جگہ میں پاکستان کے ایک جرات مندانہ نئی آواز کے طور پر ابھرنے پر بھی روشنی ڈالی گئی۔
