کیلیفورنیا۔ 23 ستمبر (اے پی پی) انٹرنیٹ کمپنی یاہو نے تصدیق کی ہے کہ ہیکرز نے اس کے 50 کروڑ صارفین کے اکاونٹس کی معلومات چوری کیں۔برطانوی نشریاتی ادارے کے مطابق ڈیٹا کی چوری 2014 ءکے شروع میں ہوئی تھی اور اس میں ذاتی معلومات کے علاوہ سکیورٹی سوالات و جوابات بھی چوری ہوئے۔ تاہم اس میں صارفین کے کریڈٹ کارڈز کا ڈیٹا چوری نہیں ہوا۔ یاہو کی جانب سے تصدیق کی گئی کہ یہ حملہ اور چوری ہونے والا مواد ابتدائی اندازے سے کہیں زیادہ بڑا ہے۔کمپنی کی جانب سے صارفین کو تجویز دی گئی ہے کہ اگر انھوں نے 2014 ء سے اپنے اکاونٹس کے پاس ورڈ تبدیل نہیں کیے تو وہ انھیں تبدیل کر لیں۔خیال رہے کہ یاہو پر ممکنہ طور پر بڑے حملے کی خبریں گذشتہ ماہ سامنے آنا شروع ہوئی تھیں جبکہ پیس نامی ہیکر نے بظاہر 20 کروڑ اکانٹس کی معلومات فروخت کرنے کی کوشش کی تھی۔
