اسلام آباد۔19دسمبر (اے پی پی):ایف آئی اے کمپوزٹ سرکل فیصل آباد نے یونان کشتی حادثے میں ملوث 3 انسانی سمگلروں کے خلاف مقدمہ درج کرلیاجبکہ غفلت برتنے پر ایف آئی اے کے 2 افسران کو گرفتار کر لیا گیا۔
ترجمان ایف آئی اے کے مطابق گرفتار ملزمان میں انسپیکٹر زبیر اشرف اور سب انسپیکٹر شاہد عمران شامل ہیں ۔گرفتار ملزمان فیصل آباد ائرپورٹ پر بطور شفٹ انچارج تعینات تھے۔گرفتار ملزمان نے دوران ڈیوٹی مسافروں کی اسکریننگ کے عمل میں غفلت اور لاپروائی کا مظاہرہ کیا۔یونان کشتی حادثے میں 18 متاثرین نے فیصل آباد ائرپورٹ سے بیرون ملک سفر کیا تھا۔17 متاثرین کو یونان کشتی حادثے میں ریسکیو کر لیا گیا تھا جبکہ سفیان نامی متاثرہ شہری کی کشتی حادثے میں موت واقع ہوئی۔
متاثرین سے عبدالروف نامی ایجنٹ نے یونان جانے کے لئے بھاری رقوم وصول کی۔مقدمے میں عبدالروف، عباس ذوالفقار اور قمر الزمان نامی انسانی سمگلروں کو نامزد کیا گیا ہے۔ملزمان کے خلاف مقدمہ درج کر کے تفتیش کا آغاز کر دیا گیا۔انسانی سمگلروں کی گرفتاری کے لئے چھاپے مارے جا رہے ہیں۔ملزمان کی گرفتاری کے لئے تمام تر وسائل کو بروئے کار لایا جا رہا ہے۔
Short Link: https://urdu.app.com.pk/urdu/?p=537734
