46 روزہ ’’ہتھیاروں سے پاک اسلام آباد‘‘ مہم میں 379 مشتبہ افراد گرفتار، 365 آتشیں اسلحہ برآمد

اسلام آباد۔16اگست (اے پی پی):اسلام آباد کیپٹل ٹیریٹری (آئی سی ٹی) پولیس نے یکم جولائی سے 15 اگست 2026 تک 46 روزہ کریک ڈاؤن کے دوران 379 مشتبہ افراد کو گرفتار کیا، 373 مقدمات درج کیے اور 365 آتشیں اسلحہ قبضے میں لے لیا، دارالحکومت میں غیر قانونی اسلحہ اور اسلحہ کی نمائش کے خلاف اپنی مہم کو تیز کر دیا۔

ترجمان آئی سی ٹی پولیس نے اتوار کو ’’اے پی پی ‘‘ کو بتایا کہ انسپکٹر جنرل آف پولیس (آئی جی پی) اسلام آباد سید علی ناصر رضوی کی خصوصی ہدایت پر شروع کی گئی ہتھیاروں سے پاک اسلام آباد مہم کو وفاقی دارالحکومت میں ٹارگٹڈ آپریشنز کے ذریعے آگے بڑھایا جا رہا ہے۔ترجمان نے بتایا کہ پکڑے گئے آتشیں اسلحے میں 29 کلاشنکوفیں، 18 رائفلیں/ کاربینز اور مختلف کیلیبر کے 318 پستول شامل ہیں۔ اس کے علاوہ خصوصی مہم کے دوران 32 خنجر اور بڑی مقدار میں گولہ بارود بھی برآمد کیا گیا۔پولیس نے خبردار کیا ہے کہ غیر قانونی اسلحہ رکھنا، اسلحے کی نمائش اور ہوائی فائرنگ قانون کے تحت جرم ہیں اور خلاف ورزی کرنے والوں کو سخت قانونی کارروائی کا سامنا کرنا پڑے گا۔

ایس ایس پی آپریشنز قاضی علی رضا نے کہا ہے کہ آئی سی ٹی پولیس غیر قانونی اسلحہ اور اسلحے کی نمائش کے خلاف زیرو ٹالرنس پالیسی پر عمل پیرا ہے اور دارالحکومت کو اس طرح کے اسلحے سے پاک کرنے کے لیے ٹارگٹڈ آپریشنز کو مزید تیز کیا جائے گا۔انہوں نے لائسنس یافتہ اسلحہ رکھنے والے شہریوں پر زور دیا کہ وہ متعلقہ تھانوں میں اپنی رجسٹریشن کو یقینی بنائیں اور جن کے پاس غیر قانونی اسلحہ ہے وہ اسے پولیس کے حوالے کر دیں۔

انہوں نے شہریوں سے مطالبہ کیا کہ وہ غیر قانونی اسلحہ رکھنے یا اسلحے کی نمائش کی اطلاع فوری طور پر پولیس کو دیں۔انہوں نے کہا کہ قانون کی پاسداری کریں اور پرامن دارالحکومت کو برقرار رکھنے میں اسلام آباد پولیس کی مدد کریں۔ایس ایس پی نے کہا کہ غیر قانونی ہتھیاروں کی روک تھام اور پرامن اور محفوظ اسلام آباد کو یقینی بنانے کے لیے ٹارگٹڈ آپریشنز اور کریک ڈاؤن مزید شدت کے ساتھ جاری رہے گا۔