اسلام آباد ۔ 9 جنوری (اے پی پی) وزیرِاعظم عمران خان کی زیر صدارت ٹاسک فورس برائے سپورٹس کا اجلاس بدھ کو ہوا۔ اجلاس میں وزیر برائے بین الصوبائی رابطہ فہمیدہ مرزا، وزیرِ دفاع پرویز خٹک، معاون خصوصی نعیم الحق، معاون خصوصی افتخار درانی، چیئرمین پی سی بی احسان مانی و دیگر شریک ہوئے۔ ٹاسک فورس کی جانب سے وزیرِاعظم کو پاکستان میں سپورٹس کے ہر شعبہ میں زبوں حالی، وجوہات اور ملک میں کھیلوں کی ترقی کےلئے سفارشات پیش کی گئیں۔ اجلاس میں کرکٹ، ہاکی، سکواش سمیت تمام کھیلوں کے حوالہ سے متعلقہ تنظیموں کی کارکردگی کا مفصل جائزہ لیا گیا اور ملک بھر میں موجود سپورٹس بورڈز کی تشکیل نو کا فیصلہ کیا گیا۔ کھلیوں کے احیاءاور سپورٹس کے میدان میں بین الاقوامی سطح پرملک کا نام روشن کرنے کےلئے نیا تنظیمی ڈھانچہ متعارف کرایا جائے گا۔ اجلاس میں فیصلہ کیا گیا کہ نئے انتظامی ڈھانچے کا باقاعدہ اعلان اس ماہ کے آخر تک کیا جائے گا۔ اس موقع پر وزیراعظم نے کہا کہ کھیلوں کے شعبہ میں ملک میں بے پناہ ٹیلنٹ موجود ہے۔ سیاسی مداخلت، بدانتظامی، سہولتوں کے فقدان اور دیگر وجوہات کی بنیاد پر پاکستان سپورٹس کے میدان میں پیچھے رہ گیا ہے۔ انہوں نے کہا کہ کھیلوں کے میدان سمیت مطلوبہ سہولتوں کی فراہمی اور مقابلہ کے رحجانات کو فروغ دے کر نوجوان نسل کے ٹیلنٹ کو اجاگر کیا جا سکتا ہے۔
