اسلام آباد ۔ 25 ستمبر (اے پی پی) چین پاکستان اقتصادی راہداری منصوبہ کے تحت سی پیک اور بیلٹ اینڈ روڈ انیشی ایٹیو سے خطے میں خوشحالی کے لئے باہمی تعاون کو فروغ حاصل ہوگا۔ سی پیک اتھارٹی حکام کے مطابق سی پیک منصوبہ مشرق وسطٰی، سینٹرل ایشیاء اور یورپ کا گیٹ وے ہے جس کے سبب اس سے خطے میں امن و استحکام اور خوشحالی کو فروغ حاصل ہوگا۔ چین اور پاکستان کا دو طرفہ تعاون اور سی پیک منصوبہ کو صرف تجارتی اور اقتصادی امور تک محدود نہیں کیا جا سکتا کیونکہ اس کا دائرہ کار ثقافتی ہم آہنگی اور تعلیم کے شعبے کی ترقی تک بھی پھیلا ہوا ہے۔ اس میگا پراجیکٹ کے ذریعے سے خطے میں امن و خوشحالی کی ایک نئی جہت کا آغاز ہو گا۔
