اسلام آباد ۔ 16 جولائی (اے پی پی) پاکستان کرکٹ بورڈ (پی سی بی) نے تینوں طرز کی کرکٹ کےلئے قومی کرکٹ ٹیم کے پرنسپل پارٹنر کی حیثیت سے پیپسی کےساتھ معاہدے میں ایک سال کی توسیع کر دی ہے۔ پاکستان کرکٹ بورڈ اور پیپسی کے درمیان یہ شراکت داری گذشتہ دو دہائیوں سے جاری ہے۔ یہ شراکت داری ابتدائی طور پر30 جون 2021ءتک جاری رہے گی۔ اس دوران پاکستان کرکٹ ٹیم کو انگلینڈ کے خلاف 3 ٹیسٹ اور 3 ٹی ٹونٹی میچوں پر مشتمل سیریز، آئی سی سی مینز ٹی ٹونٹی ورلڈکپ، زمبابوے اور جنوبی افریقہ کے خلاف ہوم سیریز، جنوبی افریقہ ، نیوزی لینڈ اور زمبابوے کے خلاف اوے سیریز کھیلنی ہیں۔ پاکستان کی پہلی موبائل فنانشل سروس، ایزی پیسہ، دورہ انگلینڈ کےلئے قومی کرکٹ ٹیم کی ایسوسی ایٹ پارٹنر ہوگی۔ پیپسی کو پاکستان کے ڈائریکٹر مارکیٹنگ اینڈ فرنچائز سعد منور خان کاکہنا ہے کہ ہم قومی کرکٹ ٹیم کے پرنسپل پارٹنر کی حیثیت سے پاکستان کرکٹ بورڈ کے ساتھ اپنی شراکت داری کے سفر کو جاری رکھنے پر فخر محسوس کر رہے ہیں۔ انہوں نے کہا کہ پیپسی، پاکستان کرکٹ اور پرجوش مداح ایک فیملی کی حیثیت رکھتے ہیں اور ہم سب اپنے چیمپئن کرکٹرز کو میدان میں شاندار کارکردگی کا مظاہرہ کرتے ہوئے کھیلتے دیکھنا چاہتے ہیں۔ پاکستان کرکٹ بورڈ کے ڈائریکٹر کمرشل بابر حامد نے کہا کہ ہمیں خوشی ہے کہ مشکل معاشی صورتحال کے پس منظر کے باوجود ہم نے پیپسی کے ساتھ ایک قابل قبول معاہدے کرلیا ہے جس کے مطابق پیپسی آئندہ 12 ماہ کے لئے پاکستان کرکٹ ٹیم کا پرنسپل اسپانسر ہوگا۔ انہوں نے کہا کہ پیپسی 1990ءکی دہائی سے ہمارا قابل قدر شراکت دار ہے اور اس دوران ہم نے مشترکہ طور پر کئی یادگار لمحات دیکھے ہیں، امید ہے یہ یادگار سفر آئندہ 12 ماہ بھی جاری رہے گا۔ بابر حامد نے کہا کہ شراکت داری کے معاہدے میں یہ توسیع پیپسی کے ساتھ ہمارے تعلقات کی عکاسی کرنے کے ساتھ ساتھ اس امر کا بھی اظہار کرتی ہے کہ وہ قومی کرکٹ ٹیم کی اسپانسرشپ کو کتنی قدر کی نگاہ سے دیکھتے ہیں۔
Short Link: https://urdu.app.com.pk/urdu/?p=207345
