اسلام آباد۔11نومبر (اے پی پی):وفاقی وزیر منصوبہ بندی و ترقی اسد عمر سے اسلام آباد چیمبر آف کامرس اینڈ انڈسٹریز (آئی سی سی آئی) کے ایک وفد نے صدر محمد شکیل منیر کی قیادت میں جمعرات کو یہاں اسلام آباد میں ملاقات کی۔ اس موقع پر خالد جاوید، عبدالرؤف، طارق صادق،شعبان خالد، اور آئی سی سی آئی کے دیگر نمائندوں نے اجلاس میں شرکت کی۔
آئی سی آئی سی آئی کے نمائندوں نے وفاقی وزیر کو نئے اسلام آباد انڈسٹریل زون کے قیام کے حوالے سے اپنے خیالات سے آگاہ کیا اور منصوبے کے اہم خدوخال پر تفصیلی تبادلہ خیال کیا۔ آئی سی سی آئی کے نومنتخب وفد کا خیرمقدم کرتے ہوئے وفاقی وزیر برائے منصوبہ بندی اسد عمر نے کہا کہ اسلام آباد میں موجودہ صنعتی علاقوں میں زمین ختم ہو چکی ہے، اور معاشی سرگرمیوں، روزگار اور محصولات پیدا کرنے اور ممکنہ طور پر قیمتی غیر ملکی ذخائر حاصل کرنے کے لیے مزید توسیع کی ضرورت ہے۔
انہوں نے کہا کہ دارالحکومت ہونے کے ناطے، غیر ملکی زائرین کے لیے ملک میں صنعتی ترقی کو دکھانے کے لیے ایک ماڈل انڈسٹریل اسٹیٹ کی ضرورت ہے۔ اسد عمر نے کہا کہ صنعتی زون میں بجلی، گیس، پانی اور دیگر بنیادی سہولیات کی فراہمی کو یقینی بنایا جائے گا۔ انہوں نے کہا کہ یہ منصوبہ نہ صرف اسلام آباد بلکہ اسلام آباد سے ملحقہ علاقوں کے شہریوں کے لیے بھی روزگار کا ذریعہ بنے گا اور صنعت کاری کے لیے بھی مددگار ثابت ہوگا۔
اجلاس میں اسلام آباد کے لیے نیا صنعتی زون بنانے کا اصولی فیصلہ کیا گیا۔ مزید، انہوں نے پبلک پرائیویٹ پارٹنرشپ (پی پی پی) کے ڈھانچے کے تحت پروجیکٹ کو تیار کرنے پر بھی تبادلہ خیال کیا۔
