لاہور۔14فروری (اے پی پی):وزیر اوقاف و مذہبی امور سید سعید الحسن نے اپنے آفس میں مختلف وفود سے ملا قات کرتے ہوئے کہا کہ وزیر اعظم عمران خان کے ریاست مدینہ کے ویزن اوروزیر اعلی پنجاب عثمان بزدار کی ہدایت پر اصلاحتی نکات اور گائیڈ لائن پر عمل پیرا ہوکرصوبہ کو ریاست مدینہ بنانے کے اقدامات جاری ہے، محکمہ اوقاف نے اپنے بہترین اقدمات اور ترقیاتی کاموں کے ذریعے نئے ریکارڈقائم کئے جس کی بنا پر یہ محکمہ دیگر محکموں کے ماتھے کا جھومر بن گیا ہے۔
انہوں نے کہا کہ ان اصلاحتی عمل کو اپناتے ہوئے دیگر محکموں نے بھی اس کی تقلید شروع کر دی ہے، سالانہ ترقیاتی پروگرام کی تکمیل کے بعد مزارات کی عمارات اور زائرین کیلئے سہولیات کی فراہمی میں مثبت تبدیلی آئی ہے،ترقیاتی سکیموں کی امتیازی خصوصیا ت و ترجیحات کے تحت تاریخی و ثقافتی عمارتی اثاثہ جات کی حفاظت، دیکھ بھال و تزئین وآرائش،مزارات پر زائرین کے لئے بنیادی سہولیات کی معیاری فراہمی،مزارات کو عوام کیلئے بلا امتیاز و تفریق فلاحی مراکز بنانا،بڑے مزارات کیلئے جامع منصوبی بندی و عمارات کا بہترین استعمال،گزشتہ پانچ سالوں کے مقابلے مین ترقیاتی بجٹ مین چار گنا اضافہ،والڈ سٹی آف لاہور اتھارٹی اور اے کے سی ایس پی کے ماہرین تعمیرات سے اشتراک کام کا آغاز ہو چکا ہے۔
انہوں نے کہا کہ محکمہ اوقاف17نکاتی اصلاحات سے دیگر محکموں کے لئے رول ماڈل بن چکا ہے، حکومت پنجاب انتہا پسندی کے تدارک کے لیے جامع حکمت عملی پر تیزی سے عمل پیر اہے اس سلسلہ میں فلاحی معاشرے کی تشکیل کے لیے صوفیا کے نظام فکر و عمل کو اپنانا وقت کا اہم تقاضا ہے، تشدد کے رجحانات کے خاتمے کے لیے محراب ومنبر کو اپناکردار ادا کرنا ہوگا۔ انہوں نے کہا کہ اسلام، انسانی جان کی حرمت کا امین اور شرف و تکریم آدمیت کا علمبردار ہے، دینی اقدار کی ترویج کے لیے موثر لائحہ عمل ترتیب دینا ہوگا، آئمہ اور خطبا کو علمی اور فکری طور پر مستعد اور موثر حیثیت میں معاشرے کی قیادت کرنے کی ضرورت ہے، سیرت طیبہ اور اسوہ رسول ﷺسے اکتسابِ فیض کے بغیر، اخلاقی سربلندی ممکن نہیں ہے۔
Short Link: https://urdu.app.com.pk/urdu/?p=295485