اسلام آباد۔22جون (اے پی پی): چیئرمین جوائنٹ چیفس آف سٹا ف کمیٹی جنرل ندیم رضا سے اطالوی مسلح افواج کے چیف آف ڈیفنس سٹاف ایڈمرل جوزپ کاوو ڈریگون نے ملاقات کی جس میں باہمی پیشہ ورانہ دلچسپی کے امور بشمول سیکورٹی اور دفاعی تعاون کو مزید مضبوط بنانے خصوصاً دفاعی پیداوار کے شعبے میں تبادلہ خیال کیا گیا۔
پاک فوج کے شعبہ تعلقات عامہ(آئی ایس پی آر) کے مطابق پاکستان کے سرکاری دورے پر آئے ہوئے اطالوی مسلح افواج کے چیف آف سٹاف ایڈمرل جوزپ کاوو ڈریگون نے بدھ کو جوائنٹ سٹاف ہیڈ کوارٹرز راولپنڈی میں چیئرمین جوائنٹ چیفس آف سٹاف کمیٹی جنرل ندیم رضا سے ملاقات کی۔ ملاقات کے دوران باہمی پیشہ ورانہ دلچسپی کے امور بشمول سیکورٹی اور دفاعی تعاون کو مزید مضبوط بنانے خصوصاً دفاعی پیداوار کے شعبے میں تبادلہ خیال کیا گیا۔
چیئرمین جوائنٹ چیفس آف سٹاف کمٹیی جنرل ندیم رضا نے اس بات کا اعادہ کیا کہ پاکستان اور اٹلی کے درمیان خوشگوار تعلقات ہیں جو امن، دفاع اور سلامتی سے متعلق تمام اہم امور پر ہم آہنگی پر مبنی ہیں۔ جنرل ندیم رضا نے کہا کہ دفاعی تعاون سمیت متعدد شعبوں میں موجودہ تعلقات کو وسعت دینے اور گہرا کرنے کی بہت گنجائش ہے۔
چیف آف دی ڈیفنس اسٹاف اٹلی نے پاکستان کی مسلح افواج کی پیشہ وارانہ مہارت کو سراہا اور دہشت گردی کے خلاف جنگ میں ان کی قربانیوں کا اعتراف کیا۔قبل ازیں جوائنٹ سٹاف ہیڈ کوارٹرز پہنچنے پر ایڈمرل جوزپ کاوو ڈریگون کو پاک فوج کے چاق و چوبند دستے نے گارڈ آف آنر پیش کیا۔
Short Link: https://urdu.app.com.pk/urdu/?p=313854
