اسلام آباد۔30اگست (اے پی پی): نیشنل بینک آف پاکستان کے بعد از ٹیکس منافع میں جاری کیلنڈر سال کے پہلے 6 ماہ میں سالانہ بنیادوں پر 121 فیصد کانمایاں اضافہ ریکارڈ کیا گیا ہے۔
بینک کی طرف سے پاکستان سٹاک ایکسچینج میں جمع کرائے گئے مالیاتی اعدادوشمار کےمطابق کیلنڈر سال کے پہلے 6 ماہ میں نیشنل بینک کو 27.03 ارب روپے کا بعد از ٹیکس منافع حاصل ہوا جو کیلنڈر سال 2022 کی اسی مدت کے مقابلہ میں 121 فیصد زیادہ ہے۔ سال 2022 کے پہلے 6 ماہ میں نیشنل بینک کو 12.20 ارب روپے کا بعد ازٹیکس منافع حاصل ہواتھا۔
کیلنڈر سال کے پہلے 6 ماہ میں بینک کی فی حصص آمدنی 12.71 روپے ریکارڈکی گئی جو سال 2022 کی اسی مدت میں 5.74 روپے فی حصص تھی۔ کیلڈر سال کی دوسری سہ ماہی میں بینک کو 15.78 ارب روپے کا خالص منافع حاصل ہوا جو سال 2022 کی اسی مدت کے مقابلہ میں 529 فیصد زیادہ ہے۔ سال 2022 کی اسی مدت میں بینک کو 2.51 ارب روپے کابعد از ٹیکس منافع حاصل ہواتھا۔ دوسری سہ ماہی میں بینک کی فی حصص آمدنی 7.42 روپے ریکارڈ کی گئی جو مالی سال کی اسی مدت میں 1.18 روپے تھی۔
Short Link: https://urdu.app.com.pk/urdu/?p=384259
