ڈیرہ غازی خان۔ 05 ستمبر (اے پی پی):ریجنل پولیس آفیسر ڈیرہ غازی خان کیپٹن (ر) سجادحسن خان کی طرف سے لیڈیز پولیس آفیسران و اہلکاران کے مسائل کے حل کےلیے ضلع کونسل ڈیرہ غازی خان میں اجلاس منعقد کیا گیا۔اجلاس میں چاروں اضلاع سے خواتین پولیس آفیسران و اہلکاران نے شرکت کی ۔ ڈسٹرکٹ پولیس آفیسر ڈیرہ غازی خان حسن افضل ،ایس پی ریجنل انوسٹی گیشن سید خالد محمود اور دیگر افسران بھی موجود تھے۔
اس موقع پر آر پی او نےاجلاس میں لیڈیز افسران و اہلکاران کے پینڈنگ ویلفئر ، تعلیمی وضائف، فیملی کلیم ، میڈیکل ،پینشن ،ٹرانسفر پوسٹنگ اور پرموشن کیسز سمیت دیگر ذاتی مسائل سماعت کرکے فوری طور پر متعلقہ اتھارٹی کو مسائل حل کرنے اور تمام درخواستوں پردس یوم کے اندر کاروائی مکمل کرنے کے احکامات جاری کیئے ۔آر پی او نے خواتین اہلکاران کے مسائل کے حل کے لیئے ریجنل پولیس آفس اور تمام اضلاع میں خصوصی ڈیسک قائم کرکے خاتون پولیس آفیسر کو بطور فوکل آفیسر تعینات کرنے اور ڈسٹرکٹ پولیس آفیسران کو لیڈیز پولیس کے مسائل ترجیح بنیادوں پرخود سماعت کرنے کاحکم جاری کیا ۔
آر پی او نے کہا کہ خواتین کے مردوں کے برابر حقوق ہیں،محکمہ پولیس میں خواتین پولیس اہلکار مرد پولیس اہلکاران کے برابر ڈیوٹی سر انجام دے رہی ہیں لہذا صنفی امتیازکی محکمہ پولیس میں کوئی جگہ نہیں۔ انہوں نے کہا کہ خواتین پولیس اہلکاران معاشرے میں موجود خواتین کے حقوق کا بہترین تحفظ کر رہی ہیں۔
Short Link: https://urdu.app.com.pk/urdu/?p=386791
