بھارت میں نپاہ وائرس سے 2ہلاکتوں کی تصدیق ، الرٹ جاری

نئی دہلی۔13ستمبر (اے پی پی):بھارت کی جنوبی ریاست کیرالہ نےنپاہ وائرس سے ہونے والی 2ہلاکتوں کے بعد الرٹ جاری کر دیا ہے ۔برطانوی نشریاتی ادارے کے مطابق بھارت کے وزیر صحت منسکھ منڈاویہ نے میڈیا کو بتایا کہ ریاست کیرالہ کے ضلع کوزی کوڈ میں 2 افراد غیر معمولی نپاہ وائرس سے ہلاک ہو گئے ہیں۔انہوں نے بتایا کہ وفاقی حکومت نے ماہرین کے لیے ایک ٹیم ریاست بھیجی ہے تاکہ صورتحال کا جائزہ لیا جا سکے اور وبا سے نمٹنے میں ریاستی حکومت کی مدد کی جا سکے۔کیرالہ کی وزیر صحت وینا جارج نے کہا ہے کہ مرنے والے 2لوگوں میں سے 168 رابطوں کی شناخت کر لی گئی ہے اور ان کا وائرس کے لیے ٹیسٹ کیا جا رہا ہے۔

انہوں نے مزید کہا کہ ریاستی حکومت نے صورتحال کی نگرانی کے لیے کوزی کوڈ میں ایک کنٹرول روم قائم کیا ہے اور صحت کے کارکنوں کو انفیکشن کنٹرول پروٹوکول پر عمل کرنے کی ہدایت دی گئی ہے۔کیرالہ کے وزیر اعلی پنارائی وجین نے کہا کہ ریاستی حکومت اموات کو بہت سنجیدگی سےلے رہی ہے اور لوگوں سے چہرے کے ماسک پہن کر احتیاط برتنے اور صرف ہنگامی حالات کے لیے ہسپتالوں کا دورہ کرنے کو کہا گیا ہے۔

ورلڈ ہیلتھ آرگنائزیشن کے مطابق، نپاہ وائرس کا انفیکشن ایک "زونوٹک بیماری” ہے جو خنزیر اور پھلوں کی چمگادڑ جیسے جانوروں سے انسانوں میں منتقل ہوتی ہےیہ آلودہ کھانے کے ذریعے اور متاثرہ شخص کے ساتھ رابطے کے ذریعے بھی پھیل سکتا ہے اس وائرس سے متاثر ہونے والوں میں اموات کی شرح زیادہ ہے کیونکہ انفیکشن کے علاج کے لیے کوئی دوا یا ویکسین دستیاب نہیں ہے۔