پشاور۔ 05 دسمبر (اے پی پی):پشاورمیں ورسک بابوگڑھی میں نجی سکول کے سامنے دھماکے میں ایک ہی خاندان کے تین بچوں سمیت 4افراد زخمی ہوگئے۔دھماکے کے بعد پولیس اور دیگر قانون نافذ کرنے والے اداروں نے علاقے کو گھیرے میں لے لیا جبکہ ریسکیو 1122اور دیگر امدادی اور فلاحی اداروں کی ٹیمیں جائے وقوعہ پہنچ گئیں۔پولیس اور ریسکیو اہلکاروں نے زخمی بچوں کو علاج کے لیے ہسپتال منتقل کر دیا جبکہ دھماکے کی نوعیت معلوم کی جا رہی ہے۔
عینی شاہدین کے مطابق دھماکے سے قریبی عمارت کے شیشے ٹوٹ گئے۔پولیس کے مطابق زخمی ہونے والے تین افراد ورسک روڈ پر چپس فروخت کرتے ہیں اور تینوں افراد کا تعلق ایک ہی خاندان سے ہے۔ ایس پی ورسک محمد ارشد خان نے بتایا کہ یہ بدقسمت واقعہ 9بجکر 10منٹ پر پیش آیا ، دھماکے کی نوعیت سے متعلق بم ڈسپوزل یونٹ ( بی ڈ ی یو) کی رپورٹ پر مزید تفصیلات فراہم کی جائیں گی۔
انہوں نے بتایا کہ یہ آئی ڈی بلاسٹ تھا جس میں 4کلوگرام بارودی مواد استعمال ہوا ہے،یہ کہنا قبل از وقت ہوگا کہ اس دھما کے میں کون ہدف تھا۔ ۔ترجمان لیڈی ریڈنگ ہسپتال محمد عاصم نے بتایا کہ ورسک روڈ دھماکے کے چار زخمیوں کو ایل آر ایچ منتقل کیا گیا ہے، تین زخمی بچے ہیں جن کی عمر سات سے دس سال کے درمیان ہیں لیکن کوئی زخمی سکول یونیفارم میں نہیں ۔
Short Link: https://urdu.app.com.pk/urdu/?p=416720
