اسلام آباد۔11دسمبر (اے پی پی):نگران وزیر اعظم انوار الحق کاکڑ نے کرکٹ بورڈ مینجمنٹ کمیٹی کے انتخابات بطریق احسن کرانے ، کھلاڑیوں کو اچھی کوچنگ کے ساتھ ساتھ بہترین تربیت ، پاکستان سپر لیگ کے میچز کا ملک بھر میں انعقاد کرانے کے لئے جامع حکمت عملی بنانے ، موجودہ کرکٹ سٹیڈیمز کی جدید خطوط پربحالی کے لئے ہنگامی بنیادوں پر کام شروع کرنے اور اسلام آباد میں 4 کرکٹ گراؤنڈز پاکستان کرکٹ بورڈ کی سرپرستی میں دینے کی ہدایات دی ہیں۔
پیر کو وزیراعظم آفس کے میڈیا ونگ سے جاری بیان کے مطابق نگران وزیر اعظم انوار الحق کاکڑ کی زیر صدارت پاکستان کرکٹ بورڈ کے امور کے حوالے سے اہم اجلاس منعقد ہوا۔ اجلاس میں نگران وفاقی وزیر برائے نجکاری فواد حسن فواد ، چیئرمین پاکستان کرکٹ بورڈ محمد ذکاء اشرف، پاکستان کرکٹ بورڈ کے چیف آپریٹنگ آفیسر سلمان نصیر، چیف سلیکٹر وہاب ریاض اور متعلقہ سرکاری افسران نے شرکت کی جبکہ پی سی بی کے عہدیداران محمد حفیظ، عمر گل اور سعید اجمل بذریعہ وڈیو لنک آسٹریلیا سے اجلاس میں شریک ہوئے۔
اجلاس کے شرکاء سے گفتگو کرتے ہوئے وزیراعظم نے کہا کہ کرکٹ کا کھیل پوری قوم کو متحد کرنے میں اہم کردار ادا کرتا ہے جس سے قومی جذبہ ابھرتا ہے۔ انہوں نے کہا کہ صرف ٹیم ورک کی بدولت ہی پاکستان کرکٹ ٹیم متحد ہو کر ہر میدان میں کامیابی حاصل کر سکتی ہے۔ وزیراعظم نے تاکید کرتے ہوئے کہا کہ پی سی بی میں ٹرینرز ، سپورٹ سٹاف اور دیگر عہدیداران کی تعیناتی کرتے ہوئے ملکی مفاد اور وقار کا خیال رکھا جائے۔انہوں نے ہدایت کی کہ کھلاڑیوں کو اچھی کوچنگ کے ساتھ ساتھ بہترین تربیت بھی کی جائے تاکہ وہ ہر سطح پر ملک و قوم کی بہتر نمائندگی کر سکیں۔
مزید برآں وزیر اعظم نے کرکٹ بورڈ مینجمنٹ کمیٹی کے انتخابات بطریق احسن کرانے کی بھی ہدایت کی۔ وزیر اعظم نے کہا کہ کرکٹ کو ملک کے دور دراز علاقوں میں بھی فروغ دینے کی ضرورت ہے ۔ انہوں نے کہا کہ اندرون سندھ، بلوچستان، جنوبی پنجاب، گلگت بلتستان، کے پی کے نئے ضم شدہ اضلاع، آزاد جموں و کشمیر وغیرہ میں کرکٹ کا بے پناہ ٹیلنٹ موجود ہے جس کو قومی سطح پر نمائندگی کاموقع دینے کی ضرورت ہے۔وزیراعظم نے ہدایت کی کہ کوئٹہ کے بگٹی سٹیڈیم اور پشاور کے اربابِ نیاز سٹیڈیم کی بحالی کا کام فوری شروع کیا جائے تاکہ یہاں قومی اور بین الاقوامی کرکٹ میچز کا انعقاد کیا جاسکے۔
انہوں نے کہا کہ گوادر کے کرکٹ سٹیڈیم اور گلگت بلتستان کے علاقے نگر میں موجود پسن کو کرکٹ میچوں کے انعقاد کےقابل بنایا جا سکتا ہے ۔ وزیر اعظم نے کرکٹ بورڈ کو ضلع نگر کے پسن سٹیڈیم کا فوری سروے کرانے کی ہدایت بھی کی۔ انہوں نے مزید ہدایت کی کہ موجودہ کرکٹ سٹیڈیمز کی جدید خطوط پربحالی کے لئے ہنگامی بنیادوں پر کام شروع کیا جائے۔ علاوہ ازیں وزیر اعظم نے ہدایت کی کہ جدید سہولیات سے آراستہ نئے کرکٹ اسٹیڈیمز اور ان کے ساتھ بین الاقوامی معیار کے ہوٹلز اور شاپنگ ایریاز کے قیام کے لئے لائحہ عمل تیار کیا جائے تاکہ سیاحت کو بھی فروغ دیا جا سکے۔وزیراعظم نے کرکٹ کی ترقی کے لئے اسلام آباد میں 4 کرکٹ گراؤنڈز کو سی ڈی اے سے لے کر پاکستان کرکٹ بورڈ کی سرپرستی میں دینے کی ہدایت بھی کی۔پاکستان سپر لیگ کے حوالے سے وزیراعظم نے لیگ کے میچز کا انعقاد ملک بھرمیں کرانے کے لئے جامع حکمت عملی بنانے کی ہدایت کی۔
وزیر اعظم نے کہا کہ پاکستان کو کرکٹ کے میدان میں دوست ممالک کے ساتھ ہر ممکن تعاون کے فروغ کے لئے کام کرنے کی ضرورت ہے ۔اجلاس کو پاکستان کرکٹ بورڈ کے حکام کی جانب سے بریفنگ دی گئی ۔ اجلاس کو بتایا گیا کہ پاکستان سپر لیگ کا انعقاد فروری 2024 میں ہو گا۔ لیگ کے میچز کراچی ، لاہور ، راولپنڈی اور ملتان میں منعقد ہوں گے۔
اجلاس کو بتایا گیا کہ پاکستان کرکٹ چیمپئنز ٹرافی کی میزبانی کرے گا ۔ بریفنگ میں بتایا گیا کہ ملک میں کرکٹ ایسوسی ایشنز کی تعداد 6 سے بڑھا کر 16 کر دی گئی جس سے علاقائی ٹیلنٹ اجاگر ہو گا۔ مزید برآں اسلام آباد ، لاہور، کراچی، گوجرانوالہ، پشاور اور بہاولپور میں کرکٹ کے انفراسٹرکچر کی تعمیر پر کام ہو رہا ہے ۔قذافی سٹیڈیم لاہور ، نیشنل سٹیڈیم کراچی اور ملتان سٹیڈیم کی شمسی توانائی پر منتقلی پر کام کیا جا رہا ہے۔اجلاس کو پاکستان میں خواتین کی کرکٹ کے فروغ کے لئے اٹھائے جا رہے اقدامات سے بھی آگاہ کیا گیا۔
Short Link: https://urdu.app.com.pk/urdu/?p=418846
