اسلام آباد۔11جون (اے پی پی):ورلڈ بینک نے واپڈا کے زیرتعمیر داسو ہائیڈرو پاور پراجیکٹ کے لئے مزید ایک ارب امریکی ڈالر فراہم کرنے کی منظوری دے دی ۔ واپڈا سے جاری اعلامیے کے مطابق ورلڈ بینک کی جانب سے اضافی رقم کی فراہمی پاکستان میں ماحول دوست اور سستی پن بجلی پیدا کرنے کے لئے درکار فنڈنگ کے حوالے سے بہت بڑی پیش رفت اور پاکستان میں کسی بھی پراجیکٹ کے لئے عالمی بینک کی یہ سب سے بڑی فنانسنگ ہے، فنانسنگ کی یہ رعایتی سہولت آئی ڈی اے اور آئی بی آر ڈی پر مشتمل ہے۔
داسو ہائیڈرو پاور پراجیکٹ کے لئے اضافی فنڈز فراہم کرنے کی منظوری ورلڈ بینک نے ایک میٹنگ کے دوران دی۔بینک کی جانب سے داسو پراجیکٹ کےلئے ایک ارب ڈالر اضافی فنانسنگ، واپڈا کی مستحکم مالی پوزیشن اور پانی و پن بجلی کے شعبوں میں بڑے منصوبوں کی کامیاب تکمیل کےلئے واپڈا کی تکنیکی مہارت پر اعتماد کا مظہر ہے۔یہ امر قا بل ذکرہے کہ ورلڈبینک پہلے ہی داسو ہائیڈرو پاور پراجیکٹ کے لئے 588 ملین ڈالر قرض اور 460 ملین ڈالر کی کریڈٹ گارنٹی فراہم کر رہا ہے۔ واپڈا اس وقت پانی اور پن بجلی کے شعبوں میں آٹھ بڑے منصوبے تعمیر کر رہا ہے
جن کی تعمیراتی لاگت تقریباً 26 ارب ڈالر ہے،یہ زیرتعمیر منصوبے آئندہ 5 سال میں مرحلہ وار مکمل ہوں گے جن کی تکمیل پر ملک میں پانی ذخیرہ کرنے کی صلاحیت میں 9.7 ملین ایکڑ فٹ اضافہ اور واپڈا کی سستی پن بجلی پیدا کرنے کی صلاحیت دوگنا ہو کر 20 ہزار میگاواٹ ہوجائے گی۔واپڈا نے ان منصوبوں کی تعمیر کے لئے اپنی مالی پوزیشن کو بروئے کار لاتے ہوئے مربوط حکمتِ عملی ترتیب دی ہے تاکہ قومی خزانے پر انحصار کم سے کم ہو۔ داسو ہائیڈرو پاور پراجیکٹ واپڈا کے زیرتعمیر8 بڑے منصوبوں میں شامل ہے،4 ہزار 320 میگاواٹ پیداواری صلاحیت کا داسو ہائیڈرو پاور پراجیکٹ صوبہ خیبر پختونخوا کے ضلع اپر کوہستان میں داسو ٹاؤن کی بالائی جانب دریائے سندھ پر تعمیر کیا جا رہا ہے۔اس منصوبے کو دو مراحل میں مکمل کیاجائے گا،
ہر مرحلے کی پیداواری صلاحیت 2 ہزار 160 میگاواٹ ہے۔ واپڈا داسو پراجیکٹ کے پہلے مرحلہ پر کام کر رہا ہے، ڈیم سائٹ پر گزشتہ سال دریائے سندھ کا رخ موڑا جا چکا ہے، منصوبے کی اہم سائٹس پر تعمیراتی کام بیک وقت جاری ہے، پہلے مرحلے سے بجلی کی پیداوار 2026 میں شروع ہو جائے گی۔ داسو پراجیکٹ کے پہلے مرحلے سے نیشنل گرڈ کو ہر سال 12 ارب یونٹ بجلی مہیا کی جائے گی جبکہ دوسرے مرحلے کی تکمیل پر مزید 9 ارب یونٹ سستی پن بجلی حاصل ہو گی
Short Link: https://urdu.app.com.pk/urdu/?p=474888
