راولپنڈی۔12جون (اے پی پی):اے این ایف نے پسنی میں بیرون ملک سمگلنگ کیلئے چھپائی گئی منشیات کی بڑی کھیپ پکڑ لی۔اے این ایف ہیڈکوارٹرز راولپنڈی سے جاری بیان کے مطابق اینٹی نارکوٹکس فورس نے منشیات سمگلنگ کے خلاف کامیاب انٹیلی جنس بیسڈ آپریشن کیا۔ آپریشن مکران کوسٹل لائن سے متصل چوڑ بندر کے علاقے میں کیا گیا۔آپریشن منشیات سمگلنگ میں ملوث گروہ کی سرگرمیوں کو مدنظر رکھتے ہوئے عمل میں لایا گیا۔
لیاقت بلوچ اور واحد بلوچ مذکورہ منشیات سمگلنگ گروہ کے سرغنہ ہیں۔ترجمان نے بتایا کہ گروہ کے ارکان سمندری راستے سے بیرون ممالک منشیات سمگلنگ میں ملوث ہیں۔انٹیلی جنس اطلاع موصول ہونے پر اے این ایف ٹیم نے مذکورہ علاقے میں چھاپہ مار کارروائی کی۔چھاپہ مار کارروائی کے دوران خفیہ مقام پر ذخیرہ کی گئی
منشیات برآمد کر لی گئیں۔ آپریشن کے دوران ایک ٹن سے زائد منشیات اور 51 ہزار نشہ آور کیپسول برآمد کئے گئے۔برآمدشدہ منشیات میں 850 کلوگرام چرس اور 164 کلوگرام آئس شامل ہے۔پکڑی گئی منشیات سمندری راستے سے بین الاقوامی منڈیوں تک پہنچائی جانی تھی۔گروہ کے سرغنہ لیاقت بلوچ اور واحد بلوچ کی گرفتاری کیلئے چھاپے مارے جا رہے ہیں۔ترجمان نے کہا کہ اے این ایف منشیات سے پاک معاشرے کے قیام کیلئے سرگرم ہے۔
Short Link: https://urdu.app.com.pk/urdu/?p=475313
