لاہور۔12جون (اے پی پی):وزیر اعلی پنجاب مریم نواز نے لاہور میں ٹریفک رسپانس یونٹ لانچ کر دیا۔انہوں نے ٹریفک رسپانس یونٹ بائیک کا معائنہ کیا،ٹریفک وارڈنز سے ٹریننگ اور دیگر امور کے بارے میں دریافت کیا۔وزیر اعلی نے ٹریفک جام کی صورت میں پبلک ایڈریس کے ذریعے میسج کا بھی مشاہدہ کیا۔ ٹریفک رسپانس یونٹ کی لانچنگ کے بعد وزیر اعلی مریم نواز کی زیر صدارت ٹریفک مینجمنٹ پر خصوصی اجلاس منعقد ہوا،جس میں لاہور انٹیلی جنس ٹریفک سگنل مینجمنٹ سسٹم کے نفاذ کا جائزہ لیا گیا۔وزیر اعلی مریم نواز نے لاہور میں ٹریفک کی روانی بہتر بنانے کیلئے ڈیڈ لائن مقررکردی۔اجلاس میں ٹریفک کی روانی میں حائل ریڑھیا ں ہٹانے کا فیصلہ کیا گیا۔وزیر اعلی پنجاب نے ریڑھیوں کے لئے متبادل جگہ فراہم کرنے کی ہدایت کی۔وزیر اعلی نے لین لائن ڈسپلن ہر صورت یقینی بنانے،رکشہ اور موٹر بائیک کو لین کی پابندی کی آگاہی مہم چلانے کی ہدایت کی۔وزیر اعلی مریم نواز نے کہا کہ روڈز پر تجاوزات کے خاتمے کے لئے موثر اور پائیدار پلاننگ کی جائے۔
مریم نواز نے ٹریفک رہنمائی کے لئے نصب سکرینیں بحال کرنے کا حکم دیا۔سی ٹی او عمارہ اطہر نے بریفنگ میں بتایا کہ خصوصی ٹریفک رسپانس یونٹ15 کال پر ٹریفک جام والے ایریا میں پہنچے گا۔50 ہیوی بائیک اور100 وارڈن کا سپیشل یونٹ ٹریفک کلیئر کرنے کیلئے فوری کارروائی کرے گا۔ٹریفک رسپانس یونٹ کو ایک ماہ کے لئے سپیشل ٹریننگ اور ریڈ کریسنٹ سے فرسٹ ایڈ کورس بھی کرایا گیا ہے۔ہر موٹر بائیک پر پبلک ایڈریس سسٹم اور فرسٹ ایڈ باکس بھی نصب ہونگے۔ٹریفک وارڈن خصوصی کیمرے کے ذریعے ریکارڈنگ بھی کرے گا۔سینئر صوبائی وزیر مریم اورنگزیب، صوبائی وزیر اطلاعات عظمی زاہد بخاری،چیف سیکرٹری زاہد اختر زمان، آئی جی ڈاکٹر عثمان انور، کمشنر زید بن مقصود، ڈپٹی کمشنر رافعہ حیدر،سی سی پی او بلال کمیانہ،ٹیپا،سیف سٹی اور دیگر متعلقہ حکام بھی موجود تھے۔
Short Link: https://urdu.app.com.pk/urdu/?p=475409
