اسلام آباد۔22جولائی (اے پی پی):دبئی اسلامک بینک پاکستان لمیٹڈ اور پاکستان کی پہلی شریعہ کمپلائنٹ بروکریج فرم زیڈ ایل کے اسلامک فنانشل سروسز کے درمیان معاہدہ طے پاگیا ہے جس کا مقصد شرعی اصولوں کے مطابق مالیاتی رسائی میں اضافہ کرنا ہے۔
مفاہمت کی یادداشت پر دستخط کی تقریب کراچی میں دبئی اسلامک بینک کے ہیڈ آفس میں منعقد ہوئی۔ معاہدے پر دبئی اسلامک بینک کے چیف ایگزیکٹو آفیسر جنید احمد اور زیڈ ایل کے اسلامک فنانشل سروسز کے چیئرمین زاہد لطیف خان نے دستخط کئے۔ اس موقع پر زیڈ ایل کے فنانشل سروسز کے چیف آپریٹنگ آفیسر اشفاق احمد خان اور دبئی اسلامک بینک میں کنزیومر بینکنگ کے سربراہ نوید ملک بھی موجود تھے۔
اس سٹریٹجک تعاون کا مقصد روشن ڈیجیٹل اکاؤنٹ ہولڈرز اور مقامی کلائنٹس سمیت دبئی اسلامک بینک کی وسیع کسٹمر بیس کے لئے شرعی اصولوں کے مطابق مالیاتی مصنوعات تک رسائی میں اضافہ کرنا ہے۔معاہدے کے تحت صارفین،سود سے پاک ،مختلف اقسام کی مالیاتی مصنوعات مثلاشیئرز، حکومت پاکستان کے اجارہ صکوک، ایکسچینج ٹریڈڈ فنڈز ، اور مرابحہ شیئر فنانسنگ میں سرمایہ کاری کرکے بروکریج کی خدمات تک رسائی حاصل کرسکتے ہیں ۔ یہ اقدام پاکستان میں اخلاقی اور شرعی اصولوں کے مطابق مالیاتی حل کو فروغ دینے اور وسعت دینے کے لیےدبئی اسلامک بینک اور زیڈ ایل کے اسلامک فنانشل سروسز کے عزم کا ثبوت ہے۔
اس موقع پر دبئی اسلامک بینک کے چیف ایگزیکٹو آفیسر جنید احمدنے کہا کہ دبئی اسلامک بینک جدید اسلامی بینکاری حل متعارف کرانے اور اُسے فروغ دینے کے لئے پرعزم ہے، زیڈ ایل کے اسلامک فنانشل سروسز کے ساتھ یہ تعاون مزید جدید مالیاتی مصنوعات تک رسائی کو بڑھانے، مالی شمولیت اور خوشحالی کو فروغ دینے کے لئے ہمارے عزم کی عکاسی کرتا ہے۔ دبئی اسلامک بینک کے ہیڈ آف کنزیومر بینکنگ نوید ملک نے کہا کہ زیڈ ایل کے کے ساتھ ہماری شراکت کا مقصدصارفین کو ان کی سرمایہ کاری پر حلال منافع حاصل کرنے میں مدد کرنا ہے۔
دبئی اسلامک بینک میں ، ہم شرعی اصولوں کے مطابق سرمایہ کاری کے مواقع فراہم کرتے ہیں، جس سے ہمارے صارفین مالیاتی سرگرمیوں میں شامل ہو سکتے ہیں جو مالی شمولیت اور شرعی اصولوں کے مطابق بینکنگ خدمات دونوں کو فروغ دیتے ہیں۔
زیڈ ایل کے اسلامک فنانشل سروسز کے چیئرمین زاہد لطیف خان نے اس شراکت کی سٹریٹجک اہمیت پر زور دیتے ہوئے کہا کہ ہم دبئی اسلامک بینک کے ساتھ شراکت کرکے اپنی بروکریج سروسز کو بہتر بنانے اورکلائنٹس کو شرعی اصولوں کے مطابق سرمایہ کاری کے مواقع تک آسان رسائی فراہم کرنے کے لئے پرُجوش ہیں، ہم مل کر ایسے ویلیو ایڈڈ حل پیش کریں گے جو اسلامی مالیات کے عالمی سطح پر منظور شدہ معیارات پر پورا اترتے ہیں ،اس شراکت داری کے ذریعے، دبئی اسلامک بینک پاکستان لمیٹڈ اور زیڈ ایل کے اسلامک فنانشل سروسز ،پاکستان کے اسلامک فنانسنگ سیکٹر کی پائیدار ترقی اور اضافے میں اپنا حصہ ڈالتے ہوئے، شرعی اصولوں کے مطابق مالیاتی خدمات کے لئے ایک سازگار ماحولیاتی نظام کو فروغ دینے کی خواہش رکھتے ہیں۔
Short Link: https://urdu.app.com.pk/urdu/?p=486387
