اسلام آباد۔30جولائی (اے پی پی):وفاقی وزیر داخلہ محسن نقوی نے انسانی سمگلنگ کی روک تھام کے عالمی دن پر اپنے خصوصی پیغام میں کہا ہے کہ بےروزگاری، غربت اور وسائل کی غیر منصفانہ تقسیم سے انسانی سمگلنگ میں اضافہ ہوا ہے۔ ترقی پذیر ممالک کوغیر قانونی انسانی سمگلنگ کا سب سے زیادہ سامنا ہے، پاکستان میں بھی انسانی سمگلنگ کے منظم گینگ سرگرم ہیں۔ اس ضمن میں ایف آئی اے ان گینگز کی سرکوبی کے لئے ہمہ وقت چوکس ہے اور متعدد ملزمان کو قانون کی گرفت میں لایا جاچکا ہے۔ انسانی سمگلنگ کی روک تھام کیلئے اقوام عالم کو کثیر الجہتی مشترکہ اقدامات اٹھانا کی اشد ضرورت ہے۔
وفاقی وزیر داخلہ نے کہا کہ انسانی سمگلرز لالچ میں ہزاروں لوگوں کی زندگیوں سے کھیلتے ہیں اور انسانی سمگلرز کے ہاتھوں کئی خاندان اپنے پیاروں سے جدا ہو چکے ہیں۔ محسن نقوی نے اس بات پر زور دیا کہ ترقی یافتہ اور ترقی پذیر ممالک کو آج اس گھناؤنے جرم کے خلاف اکٹھے کھڑے ہونا ہو گا۔ انسانی سمگلنگ انسانی حقوق، وقار اور آزادی کی صریحاً خلاف ورزی ہے۔ آئیں مل کر انسانی سمگلنگ کے خلاف آگاہی پیدا کریں اور انسانی سمگلنگ کی وجوہات کا تدارک کریں اور ایک ایسے معاشرے کے لیے کام کریں جہاں انسانی سمگلنگ کی صورت میں کسی کا استحصال نہ ہو۔
Short Link: https://urdu.app.com.pk/urdu/?p=488942
