فیصل آباد۔ 17 اکتوبر (اے پی پی):محکمہ زراعت نے کاشتکاروں کو پھول گوبھی کو نقصان رساں کیڑوں سے محفوظ رکھنےکے لئے حفاظتی اقدامات کی ہدایت کی ہے۔شعبہ پلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت فیصل آباد کے ڈپٹی ڈائریکٹراسراراحمدنے کہا ہے کہ کاشتکار پھول گوبھی کو ضررساں کیڑوں سے بچانے کےلئے فوری اقدامات یقینی بنائیں کیونکہ گوبھی کی تیتری، گوبھی کی کبڑی سنڈی، ڈائمنڈ بیکڈ ماتھ کی سنڈیاں پتوں کو کھاکر چھلنی کر دیتی ہیں جس کی وجہ سے پودا خوراک نہ بننے کے باعث کمزور ہوتا جاتاہے اور اس سے پیداوار بھی متاثر ہوتی ہے۔
انہوں نے کہا کہ پھول گوبھی کے کاشتکاروں اور کچن گارڈننگ کے شوقین افراد کو چاہیے کہ وہ بہتر پیداوار کے حصول کے لئے فصل کی مناسب دیکھ بھال کریں اور جونہی کسی کیڑے کا حملہ محسوس ہو محکمہ زراعت کے عملہ سے فوری مشاورت کرتے ہوئے مناسب زہرکا سپرے کیا جائے۔ انہوں نے کہاکہ کاشتکار ضرررساں کیڑوں کے انسداد کے لئے کھیت اور وٹوں سے جڑی بوٹیاں تلف کر دیں۔ انہوں نے کہاکہ مزید معلومات کے لئے محکمہ زراعت کی فری ہیلپ لائن سے بھی استفادہ کیاجاسکتاہے۔
Short Link: https://urdu.app.com.pk/urdu/?p=514005
