انسپکٹر جنرل نیشنل ہائی ویز اینڈ موٹروے پولیس سلمان چوہدری کی شہید سب انسپکٹر کی نماز جنازہ میں شرکت

103
انسپکٹر جنرل نیشنل ہائی ویز اینڈ موٹروے پولیس سلمان چوہدری کی شہید سب انسپکٹر کی نماز جنازہ میں شرکت

اسلام آباد۔12نومبر (اے پی پی):انسپکٹر جنرل نیشنل ہائی ویز اینڈ موٹروے پولیس سلمان چوہدری نے شہید سب انسپکٹر کی نماز جنازہ میں شرکت کی۔شہید سب انسپکٹر شبیر احمد کو آبائی گاؤں کوہارہ (گڑھی حبیب اللہ) میں پورے سرکاری اعزاز کے ساتھ سپرد خاک کر دیا گیا۔

نیشنل ہائی وے اینڈ موٹر وے پولیس کے مطابق ہزارہ ایکسپریس وے پر بٹگرام (چنار کوٹ) کے قریب موٹروے پولیس کے سب انسپکٹر شبیر احمد اور ہیڈ کانسٹیبل سہیل ملک ایک خراب گاڑی کو مدد فراہم کر رہے تھے کہ اسی اثناء ایک پک اپ ڈرائیور نے غفلت و لاپرواہی کا مظاہرہ کرتے ہوئے دونوں افسران کو کچل ڈالا جس کی وجہ سے دونوں افسران زخمی ہو گئے اور انہیں فوری طور پر ڈی ایچ کیو بٹ گرام منتقل کر دیا گیا۔ بعد ازاں شبیر احمد کو اے ایم سی ایبٹ آباد منتقل کر دیا گیا جہاں وہ زخموں کی تاب نہ لاتے ہوئے خالق حقیقی سے جا ملے۔

شہید نے سوگواران میں ایک بیوہ،3 بیٹیاں اور2بیٹے چھوڑے۔انسپکٹر جنرل نیشنل ہائی ویز اینڈ موٹروے پولیس سلمان چوہدری، ایڈیشنل انسپکٹر جنرل پولیس نارتھ ریجن یاسین فاروق، سینئر افسران اور علاقے کی عوام کی کثیر تعداد نے نماز جنازہ میں شرکت کی۔

اس موقع پر شہید کو گارڈ آف آنر بھی پیش کیا گیااور پورے سرکاری اعزاز کے ساتھ سپرد خاک کر دیا گیا۔اس موقع پر انسپکٹر جنرل سلمان چوہدری نے شہید کے خاندان والوں کے ساتھ تعزیت کا اظہار کرتے ہوئے شہید کے درجات کے بلندی کے لئے دعا اور زخمی ہیڈ کانسٹیبل کی جلد صحت یابی کیلئے دعاکی۔

آئی جی سلمان چوہدر ی نے شہید کی عظمت کو سلام پیش کرتے ہوئے کہا کہ فرض کی ادائیگی کے دوران اپنی جانوں کا نذرانہ پیش کرنے والے شہداکی عظیم قربانیوں کو خراج تحسین پیش کرتے ہیں،عوام کی حفاظت کی خاطر جام شہادت نوش کرنے والے موٹروے پولیس کے شہداء کی قربانیاں کسی سے ڈھکی چھپی نہیں ہیں۔

اس موقع پر آئی جی سلمان چوہدری نے کہا کہ بچوں کی تعلیمی اخراجات نیشنل ہائی ویز اینڈ موٹروے پولیس اٹھائی گی اور وزیر اعظم شہداء پیکیج کی جلد از جلد فراہمی کے لئے ہر ممکن اقدامات کئے جائیں گے۔