اسلام آباد۔29جنوری (اے پی پی):وفاقی وزیر مواصلات، نجکاری و سرمایہ کاری بورڈ عبدالعلیم خان کی زیر صدارت نیشنل ہائی وے اتھارٹی کا جائزہ اجلاس منعقد ہوا۔اس موقع پر چیئرمین این ایچ اے نے منصوبوں کیلئے مختص بجٹ، سارک پراجیکٹس اور اہم منصوبہ جات پر بریفنگ دی ۔ وفاقی وزیر مواصلات کی ہدایت پرحفاظتی باڑ کے معاملے پرتحقیقاتی کمیٹی تشکیل دیدی گئی جو10 دن میں رپورٹ پیش کرے گی۔
اجلاس کے دوران گفتگو کرتے ہوئے وفاقی وزیر مواصلات عبدالعلیم خان نے بتایا کہ این ایچ اے کا 50 ارب روپے کا اضافی ریونیو "ڈیپازٹ اکاؤنٹ ہوگا،فنڈز ضائع نہیں کرنے دیں گے،یہ پیسہ ان منصوبوں پر لگے گا جہاں سے مزید ریونیو حاصل ہو۔وفاقی وزیر نے کہاکہ آئندہ 5برسوں میں این ایچ اے کے محصولات میں 400ارب روپے کا اضافہ چاہتا ہوں،60 سے 110ارب روپے، ایک سال میں 50 ارب روپے کا ریونیو قابل ستائش کامیابی ہے۔
وفاقی وزیر مواصلات نے کہا کہ اولین ترجیح ایم 6کی موٹروے کی تعمیر، سکھر تا حیدرآباد کو کراچی تک بنائیں گے۔انہوں نے کہاکہ اگر جون تک ریونیو ٹارگٹ حاصل ہو گیا تو این ایچ اے سٹاف کو ایک تنخواہ کا بونس دیں گے،سیالکوٹ سے کھاریاں اور راولپنڈی موٹروے کو 4 سے 6 لین بنانے کا فیصلہ کر لیا گیا ہے،سیکرٹری مواصلات خود معائنہ کریں گے، موٹرویز پرمرمت کا کام فروری میں مکمل کریں۔ وفاقی وزیر مواصلات کی ہدایت پر این ایچ اے کی خالی جگہوں کے کمرشل استعمال کے لئے کمیٹی کا قیام عمل میں لایا گیا ہے۔
وفاقی وزیر نے کہا کہ موٹروے ایم ون سے اسلام آباد ائیر پورٹ کو بلا رکاوٹ راستہ فراہم کیا جائے، کوئی پسند ناپسند نہیں ہو گی، این ایچ اے ہر کام میرٹ پر یقینی بنانے،سب کے لئے ایک جیسی پالیسی، ادارے کو ہر حال میں اپنے فنڈز جنریٹ کرنا ہیں۔ عبدالعلیم خان نے کہا کہ پاکستان کے قومی روڈ نیٹ ورک کو خطے کا جدید ترین روڈ نیٹ ورک بنانا چاہتے ہیں۔
Short Link: https://urdu.app.com.pk/urdu/?p=553420
