شیخوپورہ۔ 03 فروری (اے پی پی):ضلع شیخوپورہ میں انسداد پولیو مہم کا باقاعدہ افتتاح ڈپٹی کمشنر شاہد عمران مارتھ نے مدر اینڈ چلڈرن کمپلیکس میں بچوں کو پولیو کے قطرے پلا کر کیا ۔ پولیو مہم کے افتتاح کے بعد پولیو ویکسی نیشن کی اہمیت کو اجاگر کرنے کے لیے آگاہی ریلی کا بھی اہتمام کیا گیا۔ ، سی ای او ہیلتھ اتھارٹی ڈاکٹر صدیق بلوچ ، ایم ایس ڈی ایچ کیو ہسپتال سمیت دیگر ضلعی افسران اس موقع پر موجود تھے ۔
ڈپٹی کمشنر شیخوپوره شاہد عمران مارتھ نے پولیو مہم کے حوالے سے گفتگو کرتے ہوئے کہا کہ پولیو کے خاتمے کے لیے مخلصانہ کاوشیں کرنا ہماری ترجیح ہے، ضلع بھر میں انسداد پولیو مہم آج سے شروع ہوکر 7 فروری تک جاری رہے گی جس کے دوران 7 لاکھ 58 ہزار 490 بچوں کو پولیو کے قطرے پلاۓ جائیں گے ۔ ڈپٹی کمشنر شاہد عمران مارتھ نے کہا کہ والدین ، اساتذہ اور علمائے کرام پولیو کے خاتمے کے لیے حکومتی کوششوں کا حصہ بنیں۔
ڈپٹی کمشنر شاہد عمران مارتھ نے کہا کہ انسداد پولیو مہم کے دوران 5 سال کی عمر کے بچوں کو پولیو ٹیمیں گھر گھر جا کر قطرے پلائیں گی ۔پولیو مہم کے دوران فیلڈ میں گھر گھر قطرے پلانے کے لیے 2 ہزار 929 موبائل ٹیمز فرائض سر انجام دیں گی ، بس اسٹینڈز ، ریلوے اسٹیشنز، مین بازاروں اور بچوں کی زیادہ آمد و رفت کے مختلف پوائنٹس پر پولیو ویکسینیشن کے لیے 55 ٹرانزٹ کیمپس قائم کیے گے ہیں ۔
ضلع بھر میں قائم 115 مراکز صحت پر بھی پولیو ویکسی نیشن کی سہولت میسر ہو گی جبکہ مجموعی طور پر پولیو مہم کے دوران قطرے پلانے کیلے 3 ہزار 99 ٹیمز فرائض کو سر انجام دیں گی۔ ڈپٹی کمشنر شیخوپوره نے اس موقع پر والدین سے اپیل ہے کہ انسداد پولیو مہم کے دوران انتظامیہ کے ساتھ تعاون کریں ۔
Short Link: https://urdu.app.com.pk/urdu/?p=555375
