اسلام آباد۔21فروری (اے پی پی):وزیراعظم محمد شہبازشریف نے ریٹیلرز کے مسائل کے حل کیلئے کمیٹی تشکیل دینے کی ہدایت کرتےہوئے کہا ہے کہ ایسے ریٹیلرز جو ٹیکس نیٹ میں موجود ہیں ان پر ٹیکس کا مزید بوجھ نہیں ڈالا جائے گا، استعمال شدہ اشیاء کی آڑ میں ہونے والی سمگلنگ کے سد باب کیلئے بھی اقدامات کئے جا رہے ہیں۔ وزیراعظم آفس کے میڈیاونگ سے جاری بیان کے ان خیالات کااظہار انہوں نے پاکستان ریٹیل بزنس کونسل کے چیئرمین زیاد بشیر کی قیادت میں وفد سے گفتگوکرتےہوئے کیا جنہوں نے جمعہ کو یہاں ان سے ملاقات کی۔
ملاقات میں میں چیئرمین پاکستان ریٹیل بزنس کونسل زیاد بشیر، شاہد حسین سی ای او سروس سیلز کارپوریشن، شہریار بخش سی ای او بیچ ٹری کے ساتھ ساتھ وفاقی وزرا احسن اقبال، جام کمال خان، احد خان چیمہ، محمد اورنگزیب، رانا تنویر حسین، وزیرِ مملکت علی پرویز ملک اور متعلقہ اعلیٰ حکام موجود تھے۔ وزیرِ اعظم نےریٹیلرز کے وفد کا خیرمقدم، مسائل کے حل کی یقین دہانی کرائی اور کہا کہ ایسے ریٹیلرز جو ٹیکس نیٹ میں موجود ہیں ان پر ٹیکس کا مزید بوجھ نہیں ڈالا جائے گا۔ایسے تمام ریٹیلرز جو ٹیکس نہیں دیتے ان کو ٹیکس نیٹ میں لانے کیلئے ترجیحی بنیادوں پر اقدامات کر رہے ہیں۔
وزیرِاعظم نے کہا کہ استعمال شدہ اشیاء کی آڑ میں ہونے والی سمگلنگ کے سد باب کیلئے بھی اقدامات تیز کر رہے ہیں۔مقامی صنعت کو جدت کو اپناتے ہوئے اپنی اشیاء کی برآمدات کیلئے جدید ٹیکنالوجی اپنانی چاہئے تاکہ وہ بین الاقوامی مارکیٹ کا مقابلہ کر سکیں۔ ایف بی آر کی دیگر اصلاحات کے ساتھ ساتھ حکومت معیشت کو کیش لیس بنانے کیلئے اقدامات کر رہی ہے۔ ملاقات میں وفد کے ارکان نے ملکی معیشت کے استحکام کیلئے وزیرِ اعظم اور ان کی ٹیم کو خراج تحسین پیش کیا اور کہا کہ مہنگائی اور شرح سود میں خاطر خواہ کمی سے مصنوعات کی کھپت اور پیدوار میں اضافہ ہو رہا ہے جو خوش آئند ہے۔
امید ہے ان اقدامات سے شرح مہنگائی میں مزید کمی آئے گی۔ صنعتوں کا پہیہ چلنے سے روزگار کے نئے مواقع پیدا ہو رہے ہیں۔ حکومتی اصلاحات خوش آئند ہیں اور ان کے معیشت پر دور رس مثبت اثرات مرتب ہوں گے۔ ریٹیلرز کو ٹیکس نیٹ میں لانے سے محصولات میں اضافہ ہوگا۔ایسے ریٹیلرز جو ٹیکس نیٹ میں موجود ہیں ان کے مسائل کے حل کیلئے حکومتی اقدامات کے معترف ہیں۔
Short Link: https://urdu.app.com.pk/urdu/?p=564449
