اٹلی کی حکومت امیگریشن قوانین میں آسانیاں پیدا کرے تاکہ پاکستانی لیگل طریقے سے آجاسکیں، گورنر پنجاب کی اٹلی کی سفیر سے ملاقات میں گفتگو

لاہور۔23فروری (اے پی پی):گورنر پنجاب سردار سلیم حیدر خان سے پاکستان میں اٹلی کی سفیر میری لینا آرمیلین نے ملاقات کی۔ گورنر ہائوس لاہور میں ہونے والی ملاقات میں باہمی دلچسپی کے امور سمیت ماحولیاتی آلودگی،تجارت بالخصوص زیتون کے حوالے سے تفصیلی تبادلہ خیال کیا گیا۔اس موقع پر گفتگوکرتے ہوئے گورنر پنجاب نے کہا کہ پاکستان اٹلی کے ساتھ اپنے تعلقات کو بہت اہمیت دیتا ہے۔

انہوں نے اس امید کا اظہار کیا کہ دونوں ممالک کے درمیان تعلقات وقت گزرنے کے ساتھ ساتھ مزید مضبوط اور مستحکم ہوں گے۔گورنر پنجاب نے کہا کہ اٹلی میں مقیم پاکستانی اٹلی کی معیشت میں مثبت کردار ادا کر رہے ہیں ۔انہوں نے کہا کہ دونوں ممالک کے درمیان مختلف شعبوں میں باہمی تعاون کے وسیع امکانات موجود ہیں۔سلیم حیدر خان نے کہا کہ پاکستان اور اٹلی کے درمیان کاروباری وفود کا تبادلہ بھی ہونا چاہئے ۔انہوں نے اٹلی کی طرف سے پاکستانی طلبہ کو ایک ہزار ووکیشنل سکالرشپس دینے پر شکریہ ادا کیا۔

انہوں نے مزید کہا کہ حال ہی میں کئی پاکستانی انسانی سمگلروں کے ہاتھوں غیر قانونی طریقے سے بیرون ملک جاتے ہوئے حادثات کا شکار ہوئے ۔انہوں نے کہا کہ حکومت کی جانب سے انسانی سمگلروں سے نمٹنے کے لیے پاکستان میں سخت اقدامات اٹھائے گئے ہیں۔انہوں نے کہا کہ اٹلی کی حکومت کو چاہئے کہ وہ امیگریشن قوانین میں آسانیاں پیدا کرے تاکہ پاکستانی لیگل طریقے سے اٹلی آجاسکیں۔گورنر پنجاب نے کہا کہ اٹلی پاکستان سے اولیو کا فروٹ امپورٹ کر کے اولیو آئل میں استعمال کر سکتا ہے۔

انہوں نے کہا کہ میڈ ان پاکستان اولیو آ ئل مارکیٹ میں آنا شروع ہو گیا ہے۔گورنر پنجاب نے کہا کہ ”میڈ ان پاکستان”اولیو آئل میں اٹلی کی ٹیکنالوجی کی سپورٹ سے اس میں مزید بہتری آئے گی۔انہوں نے مزید کہا کہ آلودگی کم کرنے کے لیے ٹرانسپورٹ کے نظام کو بہتر کرنے کی کوششیں کی جا رہی ہیں ۔انہوں نے کہا کہ حکومت پنجاب نے الیکٹرک بسیں چلانا شروع کی ہیں جس سے فضائی آلودگی کم کرنے میں مدد ملے گی۔ اٹلی کی سفیر میری لینا آرمیلین نے کہا کہ اٹلی پاکستان کے ساتھ مختلف شعبوں میں دوطرفہ تعلقات کو مزیدفروغ دینے کا خواہاں ہے۔

Short Link: https://urdu.app.com.pk/urdu/?p=565066