لاہور۔23فروری (اے پی پی):انسپکٹر جنرل پولیس پنجاب ڈاکٹر عثمان انور کا پولیس شہدا کے اہل خانہ کیلئے اپنی چھت کی فراہمی کا مشن جاری ہے جس کے تسلسل میں انہوں نے فرض کی راہ میں شہادت کا رتبہ پانے والے پولیس اہلکار کی فیملی کو گھر دے دیا ہے۔شہید ہیڈ کانسٹیبل محمد عمران کے اہل خانہ کو 01 کروڑ 35 لاکھ روپے مالیت کا گھر دے دیا گیا۔
ترجمان پنجاب پولیس نے تفصیلات سے آگاہ کرتے ہوئے بتایا کہ شہید کے اہلخانہ کو انکی پسند کے مطابق تحصیل تاندلیانوالہ فیصل آباد میں گھر خرید کر فراہم کیا گیا۔ محمد عمران نے 2023 ءمیں شہریوں کی جان و مال کی حفاظت کے دوران جام شہادت نوش کیا تھا۔
شہید محمد عمران کے اہلخانہ میں اہلیہ، ایک بیٹی اور دو بیٹے شامل ہیں۔ آئی جی پنجاب کی خصوصی کاوش پر حکومت پنجاب نے شہید کے اہلخانہ کے گھر کیلئے فنڈز جاری کئے۔ آئی جی پنجاب نے ہیڈ کانسٹیبل محمد عمران کی لازوال قربانی کو بھرپور خراج تحسین پیش کرتے ہوئے کہا کہ محمد عمران نے اپنی جان کی پرواہ کئے بغیر فرائض کی ادائیگی کے دوران جام شہادت نوش کیا۔
Short Link: https://urdu.app.com.pk/urdu/?p=565144
