پشاور۔24فروری (اے پی پی):گورنر خیبر پختونخوا فیصل کریم کنڈی نے سابق وزیراعظم محترمہ بینظیر بھٹو شہید کو خراج عقیدت پیش کرنے کے لئے اسلام آباد انٹرنیشنل ایئرپورٹ کا نام تبدیل کرکے بینظیر بھٹو انٹرنیشنل ایئرپورٹ اسلام آباد رکھنے کی باضابطہ تجویز پیش کی ہے۔
گورنر ہاوس سے جاری بیان کے مطابق گورنر نے وزیراعظم محمد شہباز شریف اور صدرمملکت آصف علی زرداری کو اپنے الگ الگ خط میں کہا کہ 21 جون 2008 کو اُس وقت کے وزیرِاعظم پاکستان نے قومی اسمبلی میں نیو اسلام آباد انٹرنیشنل ایئرپورٹ کا نام بینظیر بھٹو انٹرنیشنل ایئرپورٹ رکھنے کا اعلان کیا تھا ۔
اس وقت کے وزیر اعظم کا یہ اقدام ملک و قوم کی خاطر جان کا نذرانہ پیش کرنے پر محترمہ بینظیر بھٹو کو خراج عقیدت پیش کرنا تھا۔ 9 اگست 2008 کو اس وقت کے وزیراعظم کے اعلان پر سول ایوی ایشن اتھارٹی ک جانب سے نیو اسلام آباد ایئرپورٹ کا نام تبدیل کر کے بینظیر بھٹو انٹرنیشنل ایئرپورٹ رکھنے کا باقاعدہ اعلامیہ جاری کیا گیا۔ انہوں نے کہا کہ پاکستان سمیت دنیا کے دیگر ممالک میں بھی قومی ہیروز کے نام پر ائیر پورٹ موجود ہیں۔
اسلام ائیر پورٹ کا نام بینظیر انٹرنیشنل ایئرپورٹ رکھنا شہید محترمہ کی سیاسی، جمہوری و عوامی خدمات کو خراج تحسین پیش کرنے کے ساتھ عوامی مفاد کا اقدام تھا۔خط کے مطابق عوام کے شدید مطالبے کو مدنظر رکھتے ہوئے درخواست کرتا ہوں کہ متعلقہ حکام کو اس حوالے سے ضروری ہدایات جاری کی جائیں ۔یہ اقدام ملکی ترقی و خوشحالی اور عوامی و جمہوری جدوجہد کیلئے شہید بینظیر بھٹو کی قربانیوں کو خراج تحسین ہو گا، امید ہے کہ آپ اس پر مثبت ردعمل دیں گے۔
Short Link: https://urdu.app.com.pk/urdu/?p=565452
