پاکستان ریلویز نے لاہور سے کراچی کیلئے شاہ حسین ایکسپریس کو بحال کر دیا

لاہور۔25فروری (اے پی پی):پاکستان ریلویز نے مسافروں کی ڈیمانڈ کے پیشِ نظر لاہور سے کراچی کیلئے شاہ حسین ایکسپریس کو بحال کر دیا ۔ ترجمان کے مطابق شاہ حسین ایکسپریس، لاہور سٹیشن سے روزانہ شام 7 بجے روانہ ہو گی اور 18 گھنٹے 45 منٹ میں کراچی کینٹ پہنچے گی۔

ٹرین فیصل آباد، خانیوال، بہاولپور، روہڑی، حیدرآباد، لانڈھی اور ڈرگ روڈ پر سٹاپ کرتے ہوئے کراچی پہنچے گی۔ ٹرین 10 اکانومی، 2 اے سی بزنس، 2 اے سی سٹینڈرڈ، 1 پاور پلانٹ اور 1 بریک وین پر مشتمل ہو گی۔ریلوے انتظامیہ نے عام مسافروں کی سہولت کیلئے لاہور سے کراچی اکانومی کلاس کا کرایہ صرف 4000 روپے رکھا ہے جبکہ اے سی سٹینڈرڈ کی ٹکٹ ساڑھے سات ہزار روپے میں خریدی جا سکے گی۔

چیف ایگزیکٹو افسر پاکستان ریلویز عامر علی بلوچ نے کہا ہے کہ شاہ حسین ایکسپریس میں گرین لائن طرز کی سہولیات میسر ہوں گی۔ انہوں نے کہا کہ ٹرین میں واٹر ڈسپنسر موجود ہوں گے اور صفائی ستھرائی کیلئے عملہ بھی ہمہ وقت موجود رہے گا۔عامر بلوچ نے مزید کہا کہ ریلوے کی ریونیو سٹریم میں اضافہ ہو رہا ہے اور رواں مالی سال میں اب تک ریکارڈ 57 ارب کما چکے ہیں۔ عامر بلوچ نے کہا کہ وفاقی حکومت کی درست پالیسیوں کے پیشِ نظر ریلوے کی آپریشنل کارکردگی خاطر خواہ بہتر ہوئی ہے۔

Short Link: https://urdu.app.com.pk/urdu/?p=566236