لاہور۔10مارچ (اے پی پی):آئی جی پنجاب نے فرض کی راہ میں شہادت کا رتبہ پانے والے پولیس اہلکار کی فیملی کو گھر دے دیا۔پولیس ترجمان کے مطابق شہید کانسٹیبل محمد جہانگیر کے اہل خانہ کو 1 کروڑ 35 لاکھ روپے مالیت کا گھر ان کی پسند کے مطابق رحیم یار خان کی بہترین ہائوسنگ سکیم میں خرید کر دیا گیا ہے۔
شہید کانسٹیبل محمد جہانگیر نے 2024 میں کچہ کریمنلز کے بزدلانہ حملے میں جرات و بہادری سے لڑتے ہوئے جام شہادت نوش کیا۔شہید کانسٹیبل کے اہلخانہ میں والدین، دو بھائی اور ایک بہن شامل ہیں ۔
آئی جی پنجاب ڈاکٹر عثمان انور کی خصوصی کاوش پر حکومت پنجاب نے شہید کے اہلخانہ کے گھر کیلئے فنڈز جاری کئے۔ترجمان پنجاب پولیس نے بتایا کہ آئی جی پنجاب ڈاکٹر عثمان انور نے اس موقع پر شہید کانسٹیبل محمد جہانگیر کو بھرپور خراج عقیدت پیش کیا۔ انہوں نے کہا ہے کہ کانسٹیبل محمد جہانگیر نے اپنی جان کی پرواہ کئے بغیر فرائض کی ادائیگی کے دوران جام شہادت نوش کیا۔
Short Link: https://urdu.app.com.pk/urdu/?p=570685
