اسلام آباد۔10مارچ (اے پی پی):عالمی بینک نے کہاہے کہ عالمی سطح پر خواتین کے لیے روزگار اور اجرت میں برابری کی صورت میں جی ڈی پی میں 20 فیصد تک اضافہ ممکن ہے۔یہ بات معیشتوں کی ترقی میں خواتین کے کردارکے حوالہ سے عالمی بینک کی ایک حالیہ رپورٹ میں کہی گئی ہے۔ رپورٹ کے مطابق ترقی پذیر ممالک میں خواتین کی شمولیت سے معاشی ترقی کے عمل کوتیزکیاجاسکتاہے۔
رپورٹ کے مطابق برسرروزگار اور اقتصادی طور پر بااختیارخواتین اپنے خاندانوں،کمیو ٹیز اور معاشروں کو تبدیل کرنے میں کلیدی کردار اداکرتی ہیں۔ تحقیق کے مطابق معاشی مواقع میں خواتین کی موثر شمولیت سے غربت میں کمی کی کوششوں کوتقویت مل سکتی ہے ، خواتین اپنی کمائی کا 90 فیصد تک اپنے خاندانوں اور کمیو نٹیز میں واپس لگاتی ہیں۔ خواتین کیلئے ملازمت صرف آمد نی کا ذریعہ نہیں ہوتی بلکہ یہ عزت نفس، مقصد کے احساس اور ان کی حالت کو بدلنے کاباعث بنتی ہے۔
رپورٹ کے مطابق خواتین کے لیے روزگار اور اجرت میں برابری سے فی کس مجموعی جی ڈی پی میں 20 فیصد تک اضافہ ہو سکتا ہے تاہم خواتین کی اجرتوں میں تفاوت مسلسل برقرار ہے، 2023 میں صرف 55 فیصد خواتین لیبر مارکیٹ میں شریک ہوئیں جبکہ مردوں کی شرکت کا تناسب تقریباً 75 فیصد تھا۔ بعض خطوں میں خواتین کی شرکت 20 فیصد سے بھی کم ہے۔اگلے 10 برسوں میں افرادی قوت میں 1.2 ارب نوجوان آبادی میں شامل ہوں گی جبکہ ملازمتوں کی تعداد 420 ملین تک متوقع ہے۔
اس صورتحال میں لاکھوں افراد بشمول نوجوان خواتین معیاری روزگار سے محروم رہ سکتی ہیں۔عالمی بینک نے تعلیم بالخصوص سائنس،ٹیکنالوجی، انجنئیرنگ اورریاضی جیسے شعبوں میں خواتین کی شمولیت پر زور دیا ہے ۔ اسی طرح بینک نے زراعت اورچھوٹے و درمیانہ درجہ کے کاروبار میں خواتین کی شمولیت میں اضافہ کیلئے اقدامات کی ضرورت پر زور دیا ہے۔
Short Link: https://urdu.app.com.pk/urdu/?p=570863
