لاہور۔14مارچ (اے پی پی):لاہور، وزیر بلدیات ذیشان رفیق نے کہا ہے کہ ستھرا پنجاب پروگرام کے تحت15 لاکھ ٹن سے زائد کچرااٹھایا جا چکا ہے۔ انہوں نے کہا کہ تین ماہ کے دوران شہریوں کی جانب سے 13 ہزار 246 شکایات موصول ہوئیں جن پر 24 گھنٹوں کے اندر ایکشن لیا گیا۔
وہ سول سیکرٹریٹ میں ایک جائزہ اجلاس کی صدارت کے دوران اظہار خیال کر رہے تھے۔اس موقع پر سیکرٹری لوکل گورنمنٹ شکیل احمد میاں، سپیشل سیکرٹریز آسیہ گل، ارشد بیگ، ایل ڈبلیو ایم سی کے سی ای او بابر صاحب دین اور بہاولپور کی ویسٹ مینجمنٹ کمپنی کے سی ای او نعیم اختر بھی موجود تھے جبکہ دیگر تمام ویسٹ مینجمنٹ کمپنیز کے سی ای اوز نے بذریعہ ویڈیو لنک اجلاس میں شرکت کی۔
وزیر بلدیات ذیشان رفیق نے اس بات پر اطمینان کا اظہار کیا کہ ستھرا پنجاب پروگرام کے تحت اب تک 212 عارضی کولیکشن پوائنٹس اور 903 ویسٹ انکلوڑرز بن چکے ہیں، اس وقت پنجاب بھر میں 15 ہزار 742 گاڑیاں صفائی کا کام کر رہی ہیں جبکہ ایک لاکھ 45 ہزار آلات استعمال ہو رہے ہیں۔ وزیر بلدیات نے گوجرانوالہ اور ڈی جی خان میں کنٹینرز کی تعداد کم ہونے کا نوٹس لیتے ہوئے دونوں ویسٹ مینجمنٹ کمپنیوں کے سی ای اوز کو جلد کنٹینرز پورے کرنے کی ہدایت کی۔
انہوں نے سختی کے ساتھ کہا کہ سی ای اوز دفاتر میں نہ بیٹھے رہیں بلکہ فیلڈ کے روزانہ دورے کریں، کنٹریکٹرز کی مانیٹرنگ کا ڈیٹا بروقت اپ لوڈ نہ کرنے پر کارروائی کی جائے گی۔ ذیشان رفیق نے کہا کہ وزیراعلی مریم نواز کا ستھرا پنجاب پروگرام مکمل ڈیجیٹل ہے، اگر کسی جگہ ڈیٹا اپ لوڈ کرنے میں چیلنجز درپیش ہیں تو پی آئی ٹی بی کے تعاون سے ان کا حل نکالا جائے۔
انہوں نے ہدایت کی کہ عارضی کولیکشن پوائنٹس سے ہفتے میں کم از کم دو دفعہ لازمی کوڑا اٹھایا جائے۔ انہوں نے اس عزم کا اعادہ کیا کہ کنٹریکٹرز کی استعداد کار میں بتدریج اضافہ کیا جائے گا تاہم ضرورت اس امر کی ہے کہ طے شدہ کے پی آئیز کے مطابق کام کیا جائے۔
Short Link: https://urdu.app.com.pk/urdu/?p=572744
