جدہ ۔26مارچ (اے پی پی):وفاقی وزیر برائے مذہبی امور و بین المذاہب ہم آہنگی سردار محمد یوسف نے سعودی وزیر برائے حج و عمرہ ڈاکٹر توفیق بن فوزان الربیعہ سے ملاقات کی جس میں حج سمیت باہمی دلچسپی کے دیگر امور بارے تبادلہ خیال کیا گیا ۔
بدھ کو ترجمان مذہبی امور کے مطابق سعودی وزیر نے وزارت مذہبی امور کا قلمدان سنبھالنے پر سردار محمد یوسف کو مبارکباد دی، ملاقات میں عازمین حج اور عمرہ زائرین کے لیے سہولیات اور روڈ ٹو مکہ منصوبے کا دائرہ پاکستان کے دیگر شہروں تک پھیلانے سے متعلق تبادلہ خیال کیا گیا۔
سردار محمد یوسف نے اپنے سعودی ہم منصب سے بات چیت کرتے ہوئے کہا کہ عازمین حج کو بہترین سہولیات فراہم کرنے پر فرمانروا شاہ سلمان بن عبدالعزیز اور ولی عہد شہزادہ محمد بن سلمان کو خراج تحسین پیش کرتا ہوں،پاکستان اور سعودی عرب کے تعلقات مشترکہ عقیدے، تاریخ اور ثقافت پر استوار ہیں۔ سعودی وزیر حج نے کہا کہ ہر سال پاکستان سے عازمین حج کی بڑی تعداد سعودی عرب آتی ہے، ان کی خدمت کرنا باعث شرف ہے۔
سردار محمد یوسف نے سعودی ہم منصب کے ساتھ عازمین حج کی رجسٹریشن کے مسائل پر بھی بات چیت کی جس پر انہوں نے ترجیحی بنیاد پر پاکستانی عازمین کے مسائل حل کرانے کرنے کی یقین دہانی کرائی۔ان کا کہنا تھا کہ عازمین حج اور معتمرین کو سہولیات فراہم کرنا سعودی حکومت کی ترجیحات میں شامل ہے،پاکستانی عازمین حج کو پہلے سے بڑھ کر تعاون پیش کریں گے، بہترین سہولیات کی فراہمی کےلئے متعدد نئے اقدامات اٹھائے ہیں۔
سردار محمد یوسف نے کہا کہ پاکستانی عازمین حج کی سہولت کے لیے سعودی وزیر کی خصوصی توجہ باعث مسرت ہے۔ملاقات میں سعودی نائب وزیر حج و عمرہ ڈاکٹر عبد الفتاح مشاط، پاکستانی سفیر احمد فاروق اور ڈی جی حج عبدالوہاب سومرو بھی شریک تھے۔
Short Link: https://urdu.app.com.pk/urdu/?p=576321
