اسلام آباد ۔3اپریل (اے پی پی):بلوچستان کے مسائل کا دیرپا حل تلاش کرنے کے لیے جاری ملاقاتوں کے سلسلے میں سپریم کورٹ بار ایسوسی ایشن آف پاکستان کے صدر میاں محمد رئوف عطا نے جمعرات کو ایک پہاڑی علاقے میں بلوچ نشست میں شرکت کی اوربلوچستان نیشنل پارٹی (بی این پی – مینگل) کے صدرسردار اختر مینگل سے ملاقات کی گئی۔
سپریم کورٹ بار ایسوسی ایشن آف پاکستان کے جاری اعلامیہ کے مطابق بی این پی – مینگل کے صدر کے ہمراہ سابق سینیٹر ثناء اللہ بلوچ اور بیرسٹر جواد بھی موجود تھے جبکہ صدر سپریم کورٹ بار ایسوسی ایشن آف پاکستان کے ساتھ بلوچستان کے نائب صدرمحمد اسحاق نوتیزئی شریک تھے۔ یہ بلوچ نشست گزشتہ روز ناگزیر وجوہات کی بنا پر مؤخر کر دی گئی تھی تاہم جمعہ کوضلع مستونگ کے ایک دور دراز مقام پر منعقد کی گئی۔ احتجاجی تحریک میں مصروف بی این پی – مینگل نے اپنی جدوجہد کے محرکات اور احتجاج کے جواز کو آئینی حق قرار دیتے ہوئے اپنا مؤقف پیش کیا۔بی این پی – مینگل نے کمیٹی کے سامنے تین مطالبات رکھے جن میں تمام زیرِ حراست افراد کی رہائی، جو کہ حفاظتی تحویل میں رکھے گئے ہیں، اور نوٹیفکیشن کی واپسی (جیسا کہ سندھ حکومت نے کیا)، بی این پی – مینگل کو ریڈزون کے اندر مختص مقام پر احتجاج یا دھرنا دینے کی اجازت، مطالبات کی عدم تکمیل کی صورت میں بی این پی – مینگل کی پوری قیادت رضاکارانہ گرفتاری دینے کے لیے تیار ہوگی۔
اس موقع پر صدر سپریم کورٹ بار ایسوسی ایشن آف پاکستان نے کہا کہ پُرامن اجتماع، احتجاج، آزادیٔ اظہار اور نقل و حرکت کی آزادی، آئین کے تحت ضمانت شدہ بنیادی حقوق ہیں۔ دونوں فریقین اس بات پر متفق ہوئے کہ بی این پی – مینگل کو درپیش مسائل اور بلوچستان کے وسیع تر مسائل کا واحد حل مذاکرات، گفت و شنید اور جمہوری طرزِ عمل میں مضمر ہے۔صدر سپریم کورٹ بار ایسوسی ایشن آف پاکستان نے صوبائی اور وفاقی حکومت سے مطالبہ کیا کہ وہ ایک بااختیار کمیٹی تشکیل دے، جس کے پاس مکمل مینڈیٹ ہو تاکہ پارٹی کے جائز تحفظات کو دور کیا جا سکے اور کسی بھی ناخوشگوار واقعے یا کشیدگی کو روکا جا سکے۔
انہوں نے بلوچستان اور ملک بھر کی دیگر قومی و سیاسی جماعتوں کی قیادت سے بھی اپیل کی کہ وہ بی این پی – مینگل سے مذاکرات کے لیے اپنے نمائندے بھیجیں، تاکہ ایک کھلے مکالمے کے ذریعے مزید قابلِ عمل حل تلاش کیے جا سکیں۔ صدر سپریم کورٹ بار ایسوسی ایشن آف پاکستان نے بی این پی – مینگل کی قیادت سے درخواست کی کہ وہ ایک ایسی حکمت عملی وضع کریں جو موجودہ مسائل کے کسی قابلِ قبول حل تک پہنچنے میں مدد دے۔
Short Link: https://urdu.app.com.pk/urdu/?p=578069