اسلام آباد۔4اپریل (اے پی پی):وزیراعظم محمد شہباز شریف نے کہا ہے کہ رمضان ریلیف پیکج کے تحت ڈیجیٹل والٹ کے ذریعے نہایت شفاف اور سہل طریقہ کار سے رقوم مستحقین تک پہنچیں،رمضان ریلیف پیکج کے دوران موصول ہونے والی شکایات کو آئندہ لائحہ عمل بناتے ہوئے مدنظر رکھا جائے۔ جمعہ کو وزیراعظم آفس کے میڈیا ونگ سے جاری بیان کے مطابق انہوں نے ان خیالات کا اظہارپرائم منسٹر رمضان ریلیف پیکج 2025 کے حوالے سے جائزہ اجلاس کی صدارت کرتے ہوئے کیا۔
اجلاس میں وفاقی وزیر منصوبہ بندی احسن اقبال ، وفاقی وزیر قومی غذائی تحفظ رانا تنویر حسین ، وفاقی وزیر اقتصادی امور احد خان چیمہ ، وفاقی وزیر اطلاعات و نشریات عطاء اللہ تارڑ ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیر اعظم کے معاون خصوصی ہارون اختر، گورنر سٹیٹ بینک جمیل احمد، متعلقہ سرکاری افسران اور رمضان ریلیف پیکج کے حوالے سے معاون نجی کمپنیوں کے نمائندوں نے شرکت کی۔
وزیراعظم نے رمضان ریلیف پیکج کے لئے کام کرنے والی حکومتی کور ٹیم اور معاون اداروں کی بہترین کاکردگی کو سراہا۔ وزیر اعظم نے کہا کہ رمضان ریلیف پیکج کے حوالے سے پہلی بار ڈیجیٹل والٹ متعارف کروایا گیا جس کے ذریعے نہایت شفاف اور سہل طریقہ کار سے رقوم مستحقین تک پہنچیں ،رمضان پیکیج پورے پاکستان بشمول گلگت بلتستان اور آزاد کشمیر کے لئے بلاتفریق متعارف کروایا گیا،اس پیکیج کو شفاف بنانے کے لئے سٹیٹ بینک ، بی آئی ایس پی، پی ٹی اے، نادرا اور دیگر معاون اداروں کی کاوشیں لائق تحسین ہیں ۔
وزیراعظم نے کہا کہ رمضان ریلیف پیکج کے دوران موصول ہونے والی شکایات کو آئندہ لائحہ عمل بناتے ہوئے مدنظر رکھا جائے، اس ماڈل کو دیگر حکومتی سکیموں میں اپنایا جائے۔اجلاس کو رمضان ریلیف پیکج 2025 کے حوالے سے بریفنگ دی گئی۔بریفنگ بھی بتایا گیا کہ رمضان ریلیف پیکج کی 79 فیصد رقوم انتہائی شفاف طریقے سے مستحقین کو پہنچائی جا چکی ہیں،وزیر اعظم رمضان ریلیف پیکج کے حوالے سے 2224 ملازمین ڈیوٹی پر مامور تھے،رمضان ریلیف پیکج کے حوالے سے کل 1273 شکایات موصول ہوئیں جن کے حل کے لئے فوری اقدامات کئے گئے۔
بینکوں اور دیگر معاون اداروں کی جانب سے اس پیکج کی آگاہی کے حوالےسے 6.2 ملین روبو کالز کی گئیں، 178,700 آؤٹ باؤنڈ کالز کی گئیں جبکہ 6.1 ملین ایس ایم ایس بھیجے گئے،نیشنل ٹیلی کام کارپوریشن کے کال سینٹر سے اس پیکج کی معلومات کے حوالےسے 126,839 آؤٹ باؤنڈ جبکہ 158551 ان باؤنڈ کالز ہوئیں، رمضان پیکیج کے تحت 1.9 ملین ڈیجیٹل ادائیگیاں ہوئیں اور 951,191 ڈیجیٹل والٹ استعمال ہوئے جو کہ ڈیجیٹل نیشن پاکستان کے وژن کے تکمیل کی جانب اہم قدم ہے،823,653 خواتین نے ڈیجیٹل والٹ استعمال کئے جبکہ2,541 خصوصی افراد نے ڈیجیٹل والٹ کے ذریعے رقوم وصول کیں،الیکٹرانک ، پرنٹ اور سوشل میڈیا کے ذریعے رمضان پیکج کی بھرپور آگاہی مہم چلائی گئی ۔
Short Link: https://urdu.app.com.pk/urdu/?p=578438
