اسلام آباد۔8اپریل (اے پی پی):وفاقی وزیر پارلیمانی امور ڈاکٹر طارق فضل چوہدری نے کہا ہے کہ جب مسئلہ ریاست کا ہو اس وقت سیاست کی کوئی حیثیت نہیں ہوتی، وزیراعظم محمد شہباز شریف نے بجلی کی قیمتوں میں کمی کر کے قوم کو جو حالیہ ریلیف دیا ہے اس کے ثمرات جلد عوام تک پہنچیں گے۔منگل کو یہاں مسلم لیگ (ن) اسلام آباد کی جانب سےحکومت کی طرف سے بجلی کے نرخوں میں کمی پر اظہار تشکر اور خراج تحسین پیش کرنے کے لیے منعقدہ عوامی اجتماع سے خطاب کرتے ہوئے وفاقی وزیر پارلیمانی امور طارق فضل چوہدری نےکہا کہ قوموں کی کردار سازی بھی حکومتوں کی ذمہ داری ہوتی ہے ، گزشتہ حکومت نے قوم کی کردار سازی کی بجائے اسے خراب کرنے میں اہم کردار ادا کیا ۔حکومت نے بجلی کی قیمتوں میں کمی کا اہم سنگ میل عبور کیا ہے۔ ہمیں کئی مجبوریوں کے باعث آئی ایم ایف کے ساتھ معاہدہ کرنا پڑا ۔
آئی ایم ایف کی شرائط پوری نہ کرتے تو ڈیفالٹ میں چلے جاتے ۔ انہوں نے کہا کہ بانی پی ٹی آئی نے اپنی حکومت کے آخر میں جان بوجھ کر آئی ایم ایف کے ساتھ معاہدوں کی خلاف ورزی کی ۔جب حکومت سنبھالی تو شرطیں لگائی جا رہی تھیں کہ کب ملک ڈیفالٹ کرے۔ ہم نے عوام کی خاطر ریاست بچانے کے لیے سیاست کو قربان کیا۔ ہم نے حکمت کے ساتھ ملک کو آگے لے کر جانا ہے اور مسائل حل کرنے ہیں ۔تحریک انصاف آج بھی ہر وہ کام کرتی نظر آتی ہے جس سے ملک کو نقصان ہو ۔آج بھی آپ کو خیبر پختونخوا میں کوئی ترقی نظر نہیں آئے گی ۔بجلی کی زائد قیمتوں کے باعث متوسط طبقہ پس رہا تھا اور صنعت متاثر ہو رہی تھی۔ ان کا کہنا تھا کہ ماضی میں آئی پی پیز کے ساتھ عجیب و غریب معاہدے کیے گئے تھے ۔موجودہ حکومت نے آئی پی پیز کے ساتھ معاہدوں کا از سر نو جائزہ لیا۔آئی پی پیز کے ساتھ دوبارہ معاہدے کرنے سے 3500 ارب روپے کا فائدہ ہوا ، ایک سال میں گھریلو صارفین کو مجموعی طور پر بجلی کے نرخوں میں 10 روپے کا ریلیف دیا گیا ہے۔
منرلز انویسٹمنٹ فورم کے ذریعے پوری دنیا کو ایک پیغام دیا گیا ہے، پاکستان میں منرلز کی ایک بہت بڑی استعداد موجود ہے۔ خیبرپختونخوا کی نمائندگی آج کے اس فورم میں بھی نہیں تھی۔ پاکستان تحریک انصاف نے قومی سلامتی کمیٹی کے اجلاس کا بھی بائیکاٹ کیا۔ انہوں نے کہا کہ بلوچستان کی محرومیوں کا ازالہ کریں گے ، شر پسنداور مخالفین کچھ بھی کر لیں ہم ملک کو ہر قیمت پر آگے لے کر جائیں گے اور اس کا تحفظ کریں گے ۔ پی ٹی آئی کے حوالے سے انہوں نے کہا کہ اب یہ بلوچستان گئے ہوئے ہیں تاکہ آگ پر پٹرول ڈال سکیں ، یہ کوئی خیر سگالی کے لیے نہیں گئے یہ صرف منفی پروپیگنڈہ کے لیے گئے ہیں ۔جعفر ایکسپریس کا واقعہ ہوا، کامیاب آپریشن ہوا لیکن اس دہشت گردی کی بھی مذمت نہیں کی گئی ۔بلوچستان ہمارا ہے، وہ ہمارے بھائی ہیں، ان کے مسائل بھی حل ہوں گے۔ انہوں نے کہا کہ دنیا کا کوئی ملک اسٹبلشمنٹ کے بغیر نہیں چل سکتا لیکن ادھر اسٹبلشمنٹ کیخلاف بولنا فیشن بنا ہوا ہے، ہمیں یہ پتہ ہونا چاہیے کہ ہمارے خلاف کہاں کہاں سے سازشیں ہو رہی ہیں ،
بلوچستان میں دہشت گرد بھارت سے پیسے لے رہے ہیں اور اس کے ثبوت موجود ہیں، سرکاری ملازمین کی نمائندہ جماعت کے عہدیداروں کو بھی یقین دلاتا ہوں کہ آپ کے مسائل حل ہوں گے ، اگلے بجٹ میں سرکاری ملازمین کے لیے خوشخبری ہے۔چیئرمین قائمہ کمیٹی برائے داخلہ ایم این اے راجہ خرم نواز نے خطاب کرتے ہوئے کہا کہ بجلی کے نرخوں میں کمی پر نواز شریف اور وزیراعظم شہباز شریف کو خراج تحسین پیش کرتے ہیں ، ملک کے حالات اتنے خراب نہیں جتنے سوشل میڈیا پر دکھائے جاتے ہیں، حالات اس وقت خراب تھے جب ملک ڈیفالٹ کرنے جا رہا تھا ۔وزیراعظم نے الیکشن میں کیے گئے بجلی سستی کرنے کے وعدے کو ایک سال میں پورا کر دیا ، لیگی کارکنان منفی پروپیگنڈا کرنے والوں کو بے نقاب کریں۔ انہوں نے کہا کہ کارکنان مسلم لیگ ن کا پیغام گھر گھر پہنچائیں ، بجلی کے بعد اب دیگر اشیاء بھی سستی ہوں گی ، آنے والے دنوں میں عوام کو مزید خوشخبریاں ملیں گی۔
پارلیمانی سیکرٹری برائے تعلیم فرح ناز نے کہا کہ مسلم لیگ( ن) نے اپنے منشور میں ملک کو بحرانوں سے پاک کرنے کا وعدہ کیا تھا ، بجلی کی قیمتوں میں کمی کا اعلان پہلا قدم ہے ، بجلی کی قیمتوں میں کمی کے لیے آئی ایم ایف سے بات منوانا کوئی آسان کام نہیں تھا، وزیراعظم شہباز شریف نے عوام کی خاطر اپنی سیاست کو قربان کیا۔ اسلام آباد سے رکن قومی اسمبلی انجم عقیل خان نے کہا کہ ہماری حکومت نے ایک سال میں ملک کو ڈیفالٹ سے بھی بچایا اور ترقی کی بھی بنیاد رکھی، ملکی نوجوان نسل کے لیے بے شمار منصوبے تیار کیے گئے ہیں جس کے ثمرات جلد لوگوں تک پہنچیں گے، ہماری حکومت نے انتخابی منشور میں کیے گئے وعدوں کو پورا کرنے کا عہد کر رکھا ہے ، بجلی کی قیمتوں میں حالیہ کمی ان میں سے ایک ہے، عوام کوجلد مزید خوشخبریاں ملیں گی ۔
Short Link: https://urdu.app.com.pk/urdu/?p=579634
