ملتان ، بیوی پر تشدد کرنے والا شوہر اور دیور گرفتار

ملتان۔ 10 اپریل (اے پی پی):ورچوئل ویمن پولیس سٹیشن کی بدولت ملتان پولیس نے بیوی پر تشدد کرنے والے شوہر اور دیور کو گرفتار کر لیا۔ترجمان سیف سٹی کے مطابق جمعرات کو ملتان سے ورچوئل ویمن پولیس سٹیشن کوخاتون پر تشدد سے متعلق کال موصول ہوئی،خاتون نے بتایا کہ شوہر اور دیور نے اسے تشدد کا نشانہ بنایا ہے۔ورچوئل ویمن پولیس سٹیشن نے فوری ریسپانس کرتے ہوئے متعلقہ پولیس کو آگاہ کیا اور خاتون پر تشدد کرنے والے شوہر اور دیور کو گرفتار کر لیا ۔

ترجمان سیف سٹی نے بتایا ہے کہ ابتدائی معلومات کے مطابق معمولی گھریلو تنازع پر شوہر اور دیور نے شکایت کنندہ خاتون کو گالیاں دیں اور تشدد کا نشانہ بنایا۔پولیس نے موقع پر پہنچ کر خاتون کو تحفظ فراہم کیا اور دونوں ملزمان کو گرفتار کرکے ان کے خلاف مقدمہ درج کر لیا۔ترجمان سیف سٹی نے مزید بتایا کہ ورچوئل ویمن پولیس سٹیشن سے اب تک ساڑھے تین لاکھ سے زائد خواتین مدد حاصل کر چکی ہیں،

خواتین گھر بیٹھے ورچوئل ویمن پولیس سٹیشن پر کی گئی شکایات کا فوری فالو اپ دیکھ سکتی ہیں،خواتین 15 پر کال کرکے 2دبا کر ورچوئل ویمن پولیس سٹیشن سے مدد حاصل کر سکتی ہیں،سیف سٹی خواتین کے تحفظ اور فوری انصاف کی فراہمی کے لئے پر عزم ہے۔

Short Link: https://urdu.app.com.pk/urdu/?p=580219