اسلام آباد۔10اپریل (اے پی پی):وزیراعظم کے معاون خصوصی برائے صنعت و پیداوار ہارون اختر خان کی زیر صدارت سٹیل کے بڑے صنعتکاروں کے وفد کے ساتھ ایک اعلیٰ سطحی اجلاس منعقد ہوا۔اجلاس کے دوران ہارون اختر خان نے کہا کہ پاکستان میں سٹیل کی صنعت میں بے پناہ صلاحیت موجود ہے۔
انہوں نے وفد کو یقین دہانی کروائی کہ وہ سٹیل مینوفیکچررز کو درپیش بنیادی مسائل سے بخوبی آگاہ ہیں اور ان کے حل کے لیے پرعزم ہیں۔ انہوں نے اس بات پر زور دیا کہ وزیراعظم شہباز شریف پاکستان کی خوشحالی کے لیے دن رات کوشاں ہیں۔ وزیراعظم کے وژن کے مطابق حکومت بیمار صنعتی یونٹس کی بحالی، دیوالیہ پن کے قانون کی تیاری اور سرمایہ کاروں کے تحفظ پر توجہ مرکوز کیے ہوئے ہے۔ سٹیل کی صنعت کی بحالی اس وسیع تر صنعتی حکمت عملی کا اہم جزو ہے۔
ہارون اختر خان نے مزید کہا کہ سٹیل سیکٹر کی ترقی و حمایت سے متعلق تجاویز آئندہ بجٹ میں شامل کی جائیں گی۔ انہوں نے اس بات کا اعادہ کیا کہ حکومت سٹیل انڈسٹری کے فروغ کے لیے سنجیدہ ہے۔سٹیل مینوفیکچررز کے وفد نے پاکستان کی ترقی میں اپنا بھرپور کردار ادا کرنے کے عزم کا اظہار کیا اور کہا کہ اگر حکومت تعاون کرے تو وہ ایک مضبوط واپسی کے لیے تیار ہیں۔ہارون اختر خان نے اس موقع پر کہا کہ سٹیل سیکٹر کو درپیش چیلنجز کا حل حکومت کی اولین ترجیحات میں شامل ہے۔
Short Link: https://urdu.app.com.pk/urdu/?p=580293
