سرگودھا ۔ 16 اپریل (اے پی پی):21 ااپریل سے شروع ہونے والی انسدادِ پولیو مہم کے دوران ڈویژن بھر کے چاروں اضلاع میں 16 لاکھ 39ہزار 283 بچوں کو پولیو سے بچائوکے قطرے پلائے جائیں گے جس کیلئے 326 یونین کونسل میڈیکل آفیسرز، ایک ہزار 367 ایریاء انچارجز مقرر کئے گئے ہیں۔ ڈویژن بھر کی 318یونین کونسلوں میں مجموعی طورپر 7ہزار592 ٹیمیں جن میں 6 ہزار 969 موبائل ،424 فکسڈ اور 199 ٹرانزٹ ٹیمیں شامل ہیں ،بچوں کو قطرے پلائیں گی۔
ان خیالات کا اظہار ڈائریکٹر ہیلتھ سروسز سرگودھا ڈویژن ڈاکٹر رانا محمد ریاض نے پولیو مہم کے اتظامات کے حوالے سے جائزہ اجلاس سے خطاب کرتے ہوئے کیا۔ ڈائریکٹر ہیلتھ سروسز سرگودھا ڈویژن ڈاکٹر رانا محمد ریاض نے کہا کہ مہم کے دوران 8 ہزار 746 ورکرز حصہ لیں گے جن میں محکمہ صحت کے 7 ہزار 928، تعلیم کے 440 ، بہبود آبادی کے 249 ، سول ڈیفنس کے 34 اور دیگر محکموں کے 95 ملازمین شامل ہیں۔ ڈائریکٹر ہیلتھ ڈاکٹر رانا محمد ریاض نے کہا کہ چاروں اضلاع سرگودھا ،
خوشاب میانوالی اور بھکر میں پولیو ورکرز کی ٹریننگ جاری ہے۔ پولیو کے خلاف موثر اور پائیدار اقدامات کی بدولت آئندہ نسلیں اس موذی مرض سے محفوظ رہ سکتی ہیں لہذا انسدادِ پولیو مہم کو سو فیصد کامیابی سے ہمکنار کرنے کیلئے سرتوڑ کوششیں کی جا رہی ہے ۔ اُنہوں نے کہا کہ پبلک ٹرانسپورٹ ، بس اڈوں ، ریلوے سٹیشنز سمیت دیگر اہم عوامی مقامات پر پولیو ٹیموں کی موجود ہوں گی
جو کہ بچوں کو قطرے پلائیں گی ،اس اہم ذمہ داری میں غفلت برداشت نہیں کی جائیگی۔ اس موقع پرچیف ایگزیکٹو آفیسرہیلتھ ڈاکٹر سارہ صفدر اور ڈبلیو ایچ او کے نمائندوں کے علاوہ ڈپٹی ڈسٹرکٹ ہیلتھ آفیسرز ، میڈیکل آفیسرز کے علاوہ دیگر متعلقہ افسران نے شرکت کی۔
Short Link: https://urdu.app.com.pk/urdu/?p=582904
