اسلام آباد۔21اپریل (اے پی پی):پاکستان اور افریقی ممالک کے درمیان بڑھتے ہوئے تعلقات کے تحت روانڈا کے وزیر برائے خارجہ امور و بین الاقوامی تعاون، ایمبیسیڈر اولیور جے پی ندوہنگرے نے پیر کو وفاقی وزیر برائے تجارت جام کمال خان سے ان کے دفتر میں ملاقات کی۔ پیر کو جاری اعلامیہ کے مطابق ملاقات کا مقصد تجارت، سرمایہ کاری، سیاحت اور صنعتی ترقی کے شعبوں میں دوطرفہ تعاون کو فروغ دینا تھا۔ملاقات میں پاکستان کی افریقی منڈیوں میں دلچسپی اور بامعنی اقتصادی شراکت داری قائم کرنے کے حوالے سے تبادلہ خیال کیا گیا۔
ملاقات میں وزیر تجارت جام کمال خان نے پاکستان کے روانڈا کے ساتھ تعلقات کو مضبوط بنانے کے عزم کا اعادہ کیا اور زراعت، خدمات، آٹو مینوفیکچرنگ (خصوصاً موٹر بائیکس اور زرعی مشینری)، سیاحت، کھیل اور تعلیم جیسے کلیدی شعبوں میں تعاون کی وسیع گنجائش کو نمایاں کیا۔ وفاقی وزیر نے روانڈا کے وزیر خارجہ کو پاکستان کی سیاحت پر مبنی ایک تعارفی کتاب بھی پیش کی اور انہیں پاکستان کے شمالی علاقوں کی قدرتی خوبصورتی دریافت کرنے کی دعوت دی۔
انہوں نے عوامی اور کاروباری سطح پر روابط کو بڑھانے کی اہمیت پر زور دیا۔ایمبیسیڈر ندوہنگرے نے افریقی ممالک کے ساتھ تعاون بڑھانے کے لیے پاکستان کی کاوشوں کو سراہا اور روانڈا کی جانب سے اقتصادی شراکت داری کو مزید وسعت دینے میں دلچسپی ظاہر کی۔ انہوں نے بتایا کہ روانڈا میں سرمایہ کاروں کے لیے مکمل سہولیات سے آراستہ سپیشل اکنامک زونز موجود ہیں جو غیر ملکی سرمایہ کاری کو فروغ دیتے ہیں۔
دونوں فریقین نے دوطرفہ تعلقات میں مسلسل بہتری پر اطمینان کا اظہار کیا اور اعلیٰ سطحی روابط اور کثیرالملکی پلیٹ فارمز پر تعاون کے فروغ پر اتفاق کیا۔ انہوں نے باہمی مفادات کے نئے مواقع تلاش کرنے کے لیے قریبی تعاون جاری رکھنے کے عزم کا اعادہ کیا۔
Short Link: https://urdu.app.com.pk/urdu/?p=585334
