اقوام متحدہ۔24اپریل (اے پی پی):پاکستان نے اقوام متحدہ کی سلامتی کونسل کے ارریا فامولا اجلاس میں کثیر الجہتی تجارتی نظام میں اصلاحات کا مطالبہ کرتے ہوئے کہا ہے کہ تجارتی مسائل کو دباؤ سے نہیں مذاکرات، سفارتکاری کے ذریعے حل کرنے کی ضرورت ہے۔اقوام متحدہ میں پاکستان کے مستقل مندوب عاصم افتخار احمد نے اقوام متحدہ میں وینزویلا کے سابق سفیر ڈیاگو اریوا کے نام سے منسوب اس فارمیٹ کے تحت منعقدہ اجلاس کو بتایا کہ تجارت کو ایک پل ہونا چاہیے، رکاوٹ نہیں ، جو امن اور مشترکہ خوشحالی کے لئے ایک گاڑی ہو ، تسلط یا تنہائی نہیں۔ ہمیں اپنے اختلافات کو بات چیت کے ذریعے حل کرنا چاہیے، دباؤ کے ذریعے شرائط پر عملدرآمد کے لئے حکم نہیں دینا چاہیے۔
پاکستانی مندوب نے کثیرالجہتی اور اجتماعی اقدامات میں اعتماد کو بحال کرنے کی ضرورت پر زور دیتے ہوئے کہا کہ صرف تب ہی ہم قواعد پر مبنی ترتیب میں حقیقی اعتماد پیدا کر سکتے ہیں۔ ارریا فارمولا اجلاس غیر رسمی ہیں جو سلامتی کونسل کے اراکین کو متعلقہ موضوعات پر کھلے اور اپنے خیالات کا تبادلہ کرنے کے قابل بناتے ہیں۔ اقوام متحدہ کی سلامتی کونسل کے کے ارریا فارمولے کے اجلاس میں پاکستانی مندوب نے بات چیت اور سفارت کاری کو فروغ دینے، دوسرے ممالک کو نقصان پہنچا کر اپنے فائدے کے نقطہ نظر کو ترک کرنے، محاذ آرائی سے گریز اور باہمی مفید تعاون کو آگے بڑھانے پر زور دیا۔
انہوں نے مزید کہا کہ ہمیں کثیرالجہتی اور اجتماعی عمل پر اعتماد کو بحال کرنا چاہیے۔ انہوں نے کہا کہ آج دنیا جنگوں، عدم مساوات، معاشی عدم استحکام اور ماحولیاتی تبدیلی سے ہونے والی تباہی کے دوراہے پر کھڑی ہے جو امن اور سلامتی کے لئے خطرہ ہے۔ ہم اصولوں کے خاتمے کا بھی مشاہدہ کر رہے ہیں جنہوں نے دہائیوں سے عالمی امن اور تعاون کو فروغ دیا ہے۔ ہمیں یہ پوچھنا چاہیے کہ کیا بین الاقوامی برادری طاقت کے ایک اور دور کا متحمل ہو سکتی ہے؟ کیا وہ مشرق وسطیٰ، یورپ اور افریقہ میں جاری تنازعات میں موت اور تباہی کے بعد مزید افراتفری کو برداشت کر سکتی ہے اور دیگر بڑے حل طلب تنازعات بین الاقوامی امن اور سلامتی کے لئے خطرہ ہیں۔
انہوں نے کہا کہ عالمی ادارہ اقوام متحدہ تمام اقوام کے مفادات کے تحفظ اور فروغ کے لئے قائم کیا گیا تھا جس کی بنیاد تعاون کے جذبے اور انسانیت کی مشترکہ بھلائی پر رکھی گئی تھی، انہوں نے مزید کہا کہ عالمی ادارہ طاقتور ممالک کے مفادات کی خدمت کے لیے قائم نہیں کیا گیا تھا۔ انہوں نے کہا کہ تاریخ ہمیں یاد دلاتی ہے کہ پائیدار امن اور پائیدار حل کبھی بھی یکطرفہ اقدامات یا جبری اقدامات سے نہیں بلکہ شمولیت، احترام، مشترکہ مقصد اور متحد ردعمل سے نکلتا ہے۔ پاکستانی مندوب نے کہا کہ امن اور ترقی لازم و ملزوم ہیں ،ترقی پذیر دنیا کے لیے، پائیدار ترقی کے اہداف کا وعدہ ایک خواب ہے ، غیر منصفانہ اور استحصالی تجارت اور مالیاتی نظام، ماحولیاتی ناانصافی اور شراکت داروں کی سیاسی عزم کی کمی سے خطرہ ہے۔
پاکستانی مندوب نے کثیرالجہتی کو مضبوط بنانے میں پاکستان کے یقین کا اجاگر کرتے ہوئے دنیا پر زور دیا کہ وہ خود کو بین الاقوامی قانون اور اقوام متحدہ کے چارٹر کے اصولوں پر دوبارہ پابند کرے، یہ اصول اختیاری نظریات نہیں ہیں، بلکہ یہ ایک منصفانہ عالمی نظام کی بنیاد ہیں۔ پاکستانی مندوب نے کہا کہ ہم ایک ایسی دنیا میں یقین رکھتے ہیں جہاں تعاون جبر پر جیت جاتا ہے اور یکجہتی مصائب کے سامنے خاموش ہو جاتی ہے۔
ہمارا نقطہ نظر سادہ اور واضح ہے کہ ایک منصفانہ، زیادہ پرامن، زیادہ ہمدرد بین الاقوامی نظام ہے جو صرف چند لوگوں کی نہیں بلکہ بہت سے لوگوں کی خدمت کرتا ہے۔ اجلاس کے آغاز میں چین نے امریکا پر الزام عائد کیا کہ وہ دوسرے ممالک پر دھونس جمانے کے لئے محصولات کا استعمال کر رہا ہے۔ اقوام متحدہ میں چین کے سفیر فو کانگ نے کہا کہ جوابی اقدامات اور انصاف پسندی کی آڑ میں امریکا دوسرے ممالک کو نقصان پہنچا کر اپنا فائدہ حاصل کرنےکاکھیل کھیل رہا ہے،
جو بنیادی طور پر ٹیرف کے ذریعے موجودہ بین الاقوامی اقتصادی اور تجارتی نظام کو تباہ کرنے، امریکی مفادات کو بین الاقوامی برادری کی مشترکہ بھلائی سے بالاتر کرنے اور امریکا کے تسلط پسندانہ عزائم کو آگے بڑھانے کے بارے میں ہے۔ انہوں نے چین کے فیصلہ کن جوابی اقدامات کا بھی دفاع کیا جسے انہوں نے امریکی ٹیرف کے غلط استعمال کے طور پر بیان کیا۔ اقوام متحدہ میں امریکی سفیر ٹنگ وو نے چین پر یکطرفہ غیر منصفانہ تجارتی طریقوں کا استعمال کرنے کا الزام عائد کیا ۔
Short Link: https://urdu.app.com.pk/urdu/?p=586960
